O‘zbekiston MAGATE bilan birgalikda hududlarning sho‘rlanishiga qarshi kurashadi
Tomonlar qishloq xo‘jaligida innovatsion tabiiy o‘g‘itni qo‘llash bo‘yicha tajriba o‘tkazadi.
O‘zbekiston MAGATE bilan birgalikda tuproq sho‘rlanishiga qarshi kurash bo‘yicha qo‘shma tadqiqot loyihasini ishga tushiradi, deb xabar bermoqda “Dunyo”.
Loyiha agentlik vakillari tomonidan Qishloq xo‘jaligi vazirligi huzuridagi Tuproq tarkibi, repozitoriysi va sifatini tahlil qilish markazi bilan hamkorlikda amalga oshirilmoqda. Mutaxassislar qishloq xo‘jaligini yuritishning barqaror usullarini tadqiq qilish va ishlab chiqish hamda tuproqning sho‘rlanish darajasini kamaytirish bilan shug‘ullanadi.
Tashabbus doirasida O‘zbekistonda besh yil davomida kaliy, kalsiy, magniy va oltingugurtga boy innovatsion tabiiy mineral o‘g‘it bo‘lgan poligalitdan foydalangan holda paxta-bug‘doy-makkajo‘xori almashlab ekish tizimida dala tajribasi o‘tkaziladi.
Zamonaviy texnologiyalarni qo‘llash tuproq unumdorligini oshirish, qishloq xo‘jaligi ekinlari hosildorligini ko‘paytirish va fermerlar uchun amaliy tavsiyalar tayyorlashga yordam berishi rejalashtirilgan. Qayd etilishicha, loyihaning amalga oshirilishi O‘zbekiston va MAGATE o‘rtasidagi ilmiy va amaliy hamkorlikni mustahkamlashda muhim qadam bo‘ladi.
Avvalroq O‘zbekistonda kichik atom elektr stansiyasi qurilishi qachon boshlanishi ma’lum qilingandi. MAGATE Jizzax viloyatidagi tanlangan hududda qurilish imkoniyatlarini ijobiy baholadi.
Izohlar