Namangan viloyati Pop tumanidagi zapravkada Niva rusumli mashina toʻliq yonib ketdi. Bu haqda viloyat FVB axborot xizmati xabar berdi.

Qayd etilishicha, bugun, 3-dekabr kuni soat 18:06 da viloyat FVBga Pop tumani Chinor mahallasida joylashgan avtomobillarga gaz quyish shoxobchada Lada Niva avtomobili yonlayotgani haqida xabar kelib tushgan.

Xabarga asosan soat 18:12 da yongʻin qutqaruv ekipaji voqea joyiga yetib borgan va soat 18:19 da alanga toʻliq bartaraf etilgan.

Taʼkidlanishicha, hodisa oqibatida tan jarohati olgan yoki halok boʻlgan shaxslar yoʻq. Hozirda sodir boʻlgan yongʻin sababi va keltirilgan zarar miqdori oʻrganilmoqda.