O‘zbekistonda inflyatsiya prognozi yaxshilandi
Markaziy bank eng tez qimmatlashayotgan mahsulot va xizmatlar haqida ma’lumot berdi.
Markaziy bank O‘zbekistonda inflyatsiya darajasi bo‘yicha prognozni yaxshiladi, deb xabar bermoqda regulyator boshqaruvi matbuot xizmati.
2025-yil noyabr oyida inflyatsiyaning pasayish tendensiyasi davom etdi va uning yillik ko‘rsatkichi 7,5 foizni tashkil etdi. Bunga nisbatan qat’iy pul-kredit sharoitlari va almashuv kursining mustahkamlanishi hisobiga bazaviy inflyatsiyaning sekinlashishi asosiy hissa bo‘lib qo‘shildi. Xususan, bazaviy inflyatsiya 2025 yil noyabr oyida yillik 6,3 foizgacha pasaydi. Import narxlari nooziq-ovqat mahsulotlari inflyatsiyasini barqarorlashtirishga yordam berdi.
Shu bilan birga, xizmatlar inflyatsiyasi biroz sekinlashganiga qaramay, talab omillari hisobiga umumiy inflyatsiya darajasidan yuqoriligicha qolmoqda. Noyabr oyida aholi va tadbirkorlarning inflyatsion kutilmalari pasayishda davom etdi.
2025-yil yakuni bo‘yicha umumiy inflyatsiya 7,3 foiz atrofida bo‘ladi. Prognozning pasayish tomonga qayta ko‘rib chiqilishi milliy valyutaning oldingi hisob-kitoblarga nisbatan yuqori darajada mustahkamlanishi hisobiga import qilinadigan inflyatsiya va inflyatsion kutilmalarga kutilganidan ko‘ra kuchliroq pasaytiruvchi ta’sir ko‘rsatishi bilan izohlanadi.
Yangilangan prognozlarga ko‘ra, 2026-yil yakuni bo‘yicha inflyatsiya darajasi 6,5 foiz atrofida bo‘lishi kutilmoqda.
Iqtisodiy faollik yuqori darajada saqlanib, potensialdan yuqori o‘sish sur’atlarini shakllantiradi. Mehnat bozorida talabning o‘sishi, savdo va pullik xizmatlardan tushumlar, banklararo tranzaksiyalar hajmining ko‘payishi shundan dalolat beradi. Joriy iqtisodiy va investitsion faollik fonida yil yakuni bo‘yicha iqtisodiy o‘sish sur’atlari 7-7,5 foiz atrofida bo‘lishi kutilmoqda.
Avvalroq Markaziy bank asosiy stavkani o‘zgartirmagan va 14 foiz darajasida qoldirgandi. Qaror inflyatsiyaning barqaror pasayishini va xatarlarni minimallashtirishni ta’minlashi kerak.
Izohlar