Navoiyda qiymati 100 mln dollarlik alyuminiy qutilar zavodi quriladi

Navoiy viloyatida alyuminiy qutilar ishlab chiqaruvchi qiymati 100 mln dolarlik zavod qurilishi kutilmoqda.

Navoiy viloyatida ichimliklar uchun alyuminiy bankalar ishlab chiqarish zavodi quriladi. Investitsiyalar hajmi 100 million dollarni tashkil etadi, deb xabar beradi Investitsiyalar, sanoat va savdo vazirligi matbuot xizmati.

15-oktyabr kuni ISSV tomonidan Rossiyaning “Arnest qadoqlash yechimlari” (AQE) kompaniyasi bilan ichimliklar uchun alyuminiy bankalar ishlab chiqarish zavodini qurish loyihasini amalga oshirish bo‘yicha investitsiya shartnomasi imzolandi. Yangi zavod “Navoiy sanoatni rivojlantirish kompleksi” maxsus sanoat parki hududida joylashadi.

Kelishuvga ko‘ra, AQE investitsiyalari qariyb 100 million dollarni tashkil etadi. Korxona quvvati yiliga 1,5 milliard bankadan oshadi va zavodda 200 dan ortiq yangi yuqori malakali ish o‘rinlari yaratiladi. Zavod 2025-yilning kuzida ishga tushirilishi kutilmoqda.

Ichimliklar uchun alyuminiy qadoq ishlab chiqarish O‘zbekiston uchun yangi texnologiya hisoblanadi. Ishlab chiqarilayotgan mahsulotning 30 foizdan ortig‘ini eksport qilish rejalashtirilgan.

Loyihaning amalga oshirilishi nafaqat O‘zbekiston hukumati imtiyozli soliq rejimi va subsidiyalar ko‘rinishidagi investitsiyalar uchun qulay shart-sharoitlar yaratishi, balki xorijiy investorga aniq ishlab chiqarishning texnik talablariga to‘liq javob beradigan tayyor ishlab chiqarish maydonchasi taklif qilib, infratuzilmani jismonan rivojlantirish orqali hamkorlikning yana bir namunasi bo‘ladi, dedi vazir o‘rinbosari Xurram Teshaboyev.

AQE bosh direktori Aleksandr Isayevning ta’kidlashicha, O‘zbekistonda ishlab chiqarishni mahalliylashtirish kompaniyaning YEOII, Markaziy Osiyo va Kavkaz mamlakatlari eksport bozorlaridagi o‘rnini mustahkamlaydi.

Bu kompaniyaning RFdan tashqaridagi birinchi korxonasi, deb yozdi “Vedomosti” ishlab chiqaruvchi vakiliga tayanib.

NOVA24 YouTubeʼda. Obuna boʻling
Asosiy yangiliklar va qiziqarli videolar