Qirg‘iziston ko‘mir eksportini yarim yilga chekladi
Tegishli qaror 21-noyabr kuni Vazirlar Mahkamasi raisi Oqilbek Japarov tomonidan imzolangan.
Qirg‘iziston Vazirlar Mahkamasi mamlakatdan ko‘mir eksportini vaqtincha taqiqlash to‘g‘risida qaror qabul qildi. Bu haqda “Kabar” axborot agentligi xabar bermoqda.
Tegishli qaror 21-noyabr kuni Vazirlar Mahkamasi raisi Oqilbek Japarov tomonidan imzolangan.
Hujjatda ko‘rsatilishicha, Qirg‘izistondan ko‘mirni avtomobil transportida Yevrosiyo iqtisodiy ittifoqi bojxona hududidan tashqariga olib chiqish taqiqlangan. Biroq “Irkeshtam avtoyo‘l” va “Torug‘art avtoyo‘l” avtomobil o‘tish punktlari bundan mustasno. Cheklov “Qirg‘izko‘mir” davlat korxonasining ushbu o‘tish punktlari orqali avtomobil transportida ko‘mir eksport qilishiga nisbatan qo‘llanilmaydi.
Cheklov Yevrosiyo iqtisodiy ittifoqi davlatlarining tashqi iqtisodiy faoliyati tovar nomenklaturasining 2701 va 2702 kodlari bilan tasniflanadigan ko‘mirga nisbatan qo‘llaniladi. Taqiq olti oy muddatga joriy etilgan.
Qirg‘iziston Iqtisodiyot va savdo vazirligi mazkur qaror kuchga kirgan kundan boshlab uch kundan kechiktirmay, belgilangan tartibda Jahon savdo tashkiloti va Yevrosiyo iqtisodiy komissiyasini bu haqda xabardor qiladi.
Qirg‘iziston Tashqi ishlar vazirligi esa MDH Ijroiya qo‘mitasini qaror haqida xabardor qilishi kerak.
Qaror rasmiy e’lon qilinganidan so‘ng 15 kun o‘tgach kuchga kirishi belgilangan.
Мавзуга оид хабарлар:
Qirg‘izistonda o‘zbekistonlik ayol ekstremistik materiallar tarqatishda ayblanib ushlandi Salimboy Qirg‘iziston janubini to‘liq nazorat qilardi — Tashiyev O‘zbekistonda kungaboqar urug‘larini olib chiqishga qo‘yilgan taqiq bekor qilindi Qashqadaryoda koʻmir taʼminoti uchun ajratilgan 515 mln soʻm talon-toroj qilindi Oʻzbekistonda savdoni rivojlantirish boʻyicha alohida kompaniya ochiladi