“Ochlik bilan qiynab, kaltaklashyapti”: Sirdaryoda ko‘chma hayvonot bog‘ini ko‘rgan ekofaollar vahimaga tushdi
Mahalliy hokimiyatdan vaziyatni hal qilish so‘ralgan.
Sirdaryo viloyatida noma’lum shaxslar shahar markazida ko‘chma hayvonot bog‘ini tashkil etib, unda yovvoyi hayvonlarni shafqatsiz sharoitlarda saqlamoqda. Bu haqda ekofaollar NOVA24’ga ma’lum qildi.
Guliston markaziy bozori hududida ko‘chma hayvonot bog‘i ochildi. Guvohlar ulashgan kadrlarda bo‘rilar, ayiqlar, sudralib yuruvchilar va sherlar sanitariya qoidalariga rioya qilinmagan holda tor qafaslarda saqlanayotganini ko‘rish mumkin. Shuningdek, Ecolog.uz Telegram-kanali muallifi hayvonlar oziq-ovqatsiz va suvsiz saqlanayotgani, hayvonot bog‘i xodimlari tomonidan muntazam ravishda kaltaklanayotgani haqida gapirdi.
Ekofaollar bu holat qonunbuzarlik ekanini eslatdi. Xususan, mamlakatda 2025-yil 1-yanvardan boshlab jismoniy shaxslarga yovvoyi hayvonlarni tutqunlikda saqlash, shuningdek, ulardan davlat va ko‘chma sirklarda foydalanish taqiqlanadi. Bunday hayvonlarni hayvonot bog‘lari va pitomniklarda saqlash maxsus ruxsatnoma bo‘lgandagina mumkin. Sirdaryo viloyati va Guliston Ekologiya boshqarmalari vaziyatni o‘rganishga chaqirdi.
Avvalroq Toshkent viloyatida erkak Qizil kitobga kiritilgan lochinlarni noqonuniy ravishda olib chiqishga uringani haqida xabar berilgan edi. Jinoyatchi qushlarning ko‘zlari va oyoqlarini bog‘lab, qanotlarini skotch bilan o‘rab, kontrabandani yashirish uchun tor sumkaga zichlab joylashtirgan.
Izohlar