Chirchiqda maktab direktori tug‘ilgan kuniga kelmagani uchun o‘qituvchilarga tanbeh berdi

Ijtimoiy tarmoqlarda Chirchiq shahrida maktab direktori tug‘ilgan kuni munosabati bilan uchrashuvga kelmagani uchun o‘qituvchilarga tanbeh bergani haqida xabarlar tarqaldi. MMTB hodisaga izoh berdi.

Chirchiq shahridagi 12-umumta’lim maktabi direktori Telegramdagi videoaloqa orqali pedagoglar bilan muloqot qildi. Rolikda aytilishicha, o‘sha kuni sobiq maktab rahbarining tug‘ilgan kuni bo‘lgan, biroq ko‘plab o‘qituvchilar uchrashuvga kelmagan. Ma’lum bo‘lishicha, voqea yozda sodir bo‘lgan.

MMTB ma’lumotlariga ko‘ra, ta’lim muassasasi rahbariyatida aniqlangan qoidabuzarliklar, xususan, o‘quv yuklamasini adolatsiz taqsimlash va boshqa noqonuniy xatti-harakatlar tufayli sentyabr oyida direktor bilan tuzilgan mehnat shartnomasi uning arizasiga ko‘ra bekor qilingan, hodisa esa u ishdan bo‘shatilishidan oldin sodir bo‘lgan.

Eslatib o‘tamiz, Sirdaryoda bog‘cha tarbiyachisi bolaga shafqatsiz munosabatda bo‘lgan edi. Viloyat IIB tomonidan tekshiruv o‘tkazilib, ikki nafar xodim ishdan bo‘shatilgan.