G‘azo sektorida o‘t ochishni to‘xtatish shartnomasi kuchga kirdi

Isroil va HAMAS guruhi o‘rtasida o‘t ochishni to‘xtatish to‘g‘risidagi kelishuv kuchga kirdi, deb yozadi TASS SAXAL armiyasi matbuot xizmatiga tayanib.

Ma’lumotlarga ko‘ra, kelishuv soat 12:00 dan kuchga kirgan va shu vaqtdan boshlab SAXAL qo‘shinlari o‘t ochishni to‘xtatish va garovga olinganlarni qaytarishga tayyorgarlik ko‘rish bo‘yicha kelishuv doirasida yangilangan joylashuv chiziqlari bo‘ylab pozitsiyalarni egallab turibdi. Isroil televideniyesining 12 kanali ma’lumotlariga ko‘ra, G‘azo sektorida radikallar tomonidan garovga olinganlar ozod qilinishiga 72 soat qolgan.

Qayd etilishicha, 10-oktyabrga o‘tar kechasi Isroil bosh vaziri idorasi yahudiy davlati hukumati “barcha garovga olinganlarni — tiriklarni ham, halok bo‘lganlarni ham ozod qilish bo‘yicha kelishuvni” tasdiqlaganini ma’lum qilgan. Avvalroq, 9 oktyabr kuni Donald Tramp Isroil va Falastinning HAMAS radikal harakati vakillari Misrdagi muzokaralar natijasida tinchlik rejasining birinchi bosqichi bo‘yicha kelishuvlarga erishganini ma’lum qilgandi.

Isroil hukumati vakili Shosh Bedrosyanning ma’lum qilishicha, rejim Vazirlar Mahkamasi ushbu kelishuvlarni ma’qullaganidan keyin 24 soat ichida kuchga kiradi va shu paytda Isroil qo‘shinlari G‘azoning markaziy hududlaridan olib chiqilib, sektor ichidagi kelishilgan chiziqqa joylashtiriladi va anklav hududining 53 foizi Isroil harbiy nazorati ostida qoladi. Shundan so‘ng Shosh Bedrosyanning so‘zlariga ko‘ra, “72 soatlik darcha ochiladi” va bu vaqt ichida barcha isroillik garovga olinganlar uylariga qaytariladi.

Avvalroq O‘zbekiston G‘azo sektorida o‘t ochishni to‘xtatish va garovga olinganlarni ozod qilish bo‘yicha kelishuvni olqishlagani xabar qilingandi. Mamlakat TIV o‘t ochishni to‘xtatish tomonlar o‘rtasida xavfsizlik va barqaror yashashni kafolatlaydigan uzoq muddatli siyosiy kelishuv sari qadam bo‘lishi kerakligini ta’kidladi.