Toshkent ekskavator gaz quvuriga shikast yetkazishi oqibatida 3,5 ming xonadon gazsiz qoldi

Toshkent shahrida qazish ishlari olib borilayotgan vaqtda o‘rta bosimli gaz quvuriga shikast yetkazildi.

Toshkent shahri Yakkasaroy tumani, Bobur ko‘chasida 8-noyabr kuni ekskavator yordamida qazish ishlari olib borilayotganda, ehtiyotsizlik oqibatida o‘rta bosimli gaz quvuriga shikast yetkazilgan. Bu haqda Energetika vazirligi matbuot xizmati xabar berdi.

Natijada Yakkasaroy tumanida joylashgan ko‘p qavatli binolardagi 2400 ta va 1100 ta yerli xonadon vaqtincha tabiiy gaz tarmog‘idan o‘chirildi.

Shuningdek, Mirobod tumanining Nukus, Abdulla Qahhor, Damariq va Hamid Sulaymon ko‘chalari isteʼmolchilari ham gaz tarmog‘idan o‘chirilgan.

Taʼmirlash ishlari yakunlangach, tabiiy gaz taʼminoti bosqichma-bosqich tiklanishi aytildi.

NOVA24 Instagramʼda. Obuna boʻling
Asosiy yangiliklar va qiziqarli videolar