O‘zbekistonda yagona to‘lov QR-kodi joriy etiladi
Talab biznes uchun majburiy bo‘ladi.
O‘zbekistonda 2026-yildan boshlab savdoni amalga oshiruvchi barcha yuridik shaxslar uchun elektron to‘lovlarni qabul qilish uchun yagona QR-kod joriy etiladi, deyiladi prezident farmonida.
Ma’lumotlarga ko‘ra, rasmiylar 2025-yil oxirigacha tegishli QR-kodni joriy etishni rejalashtirmoqda. 2026-yildan boshlab savdo va xizmat ko‘rsatish sohasidagi barcha yuridik shaxslar banklar tomonidan shakllantirilgan yagona QR-kod orqali elektron to‘lovlarni qabul qilishlari shart.
Bunda, 2026-yil 1-iyuldan boshlab savdo va xizmat ko‘rsatish sohasidagi barcha yuridik shaxslar uchun yagona QR-kodli tizim orqali to‘lovlarni qabul qilish majburiy bo‘ladi va uning mavjud emasligi savdo qoidalarini buzish deb hisoblanadi.
Eslatib o‘tamiz, 2026-yildan boshlab O‘zbekistonda bir qator to‘lovlarni bank kartalari yoki elektron to‘lov tizimlari orqali amalga oshirish mumkin bo‘ladi. Hujjatda yashirin iqtisodiyotning yalpi ichki mahsulotdagi ulushini 1,3 baravarga qisqartirish, shuningdek, savdo va xizmat ko‘rsatish sohalarida aholining naqd pulsiz to‘lovlari ulushini 75 foizgacha oshirish ko‘zda tutilgan.
Izohlar