MB uchta bankni jarimaga tortdi va ikkita to‘lov tizimi faoliyatini chekladi
Regulyator prudensial me’yorlar va jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish qoidalari buzilishini aniqladi — banklar, MMO va to‘lov tashkilotlari sanksiyalar ostida qoldi.
O‘zbekiston Markaziy bankining Bank nazorati qo‘mitasi bir qator moliya muassasalariga nisbatan sanksiyalar qo‘lladi. Regulyator matbuot xizmatining xabar berishicha, 2025-yil oktyabr oyida qo‘mita yettita yig‘ilish o‘tkazib, ularda 20 dan ortiq masala ko‘rib chiqilgan.
Moliyaviy tashkilotlar faoliyatini o‘rganish natijalariga ko‘ra, bitta bank va bitta to‘lov kompaniyasi prudensial talablarni buzganlik, qonunchilikka nomuvofiqlik va tekshiruvlar davomida aniqlangan kamchiliklar uchun jarima solinishi mumkinligi to‘g‘risida ogohlantirildi.
Uchta bank, beshta mikromoliya tashkiloti va ikkita to‘lov xizmatiga nisbatan jarima choralari qo‘llanildi. Qoidabuzarliklar Markaziy bank talablariga, shuningdek, Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish bo‘yicha PJR/TF qoidalariga taalluqli bo‘lgan.
Bundan tashqari, aniqlangan qoidabuzarliklar tufayli 13-noyabrdan boshlab Tezpay va National Pay’ning ayrim operatsiyalari olti oyga cheklandi. Elektron to‘lovlarni qayta ishlash, ma’lumotlarni banklarga uzatish, bunday operatsiyalar bo‘yicha mablag‘larni qabul qilish va to‘lov tizimlari orqali pul o‘tkazmalarini amalga oshirish taqiqlandi.
Izohlar