Kengash Toshkent shahrida issiq suv va issiqlik ta’minoti narxlarini oshirishni ma’qulladi

Toshkentda issiq suv va issiqlik tariflari oshirilishi rejalashtirilmoqda. Bu haqdagi qaror 22-avgust kuni Veolia Energy Tashkent kompaniyasi taklifiga binoan xalq deputatlari poytaxt kengashi tomonidan qabul qilingan.

Aholi uchun narxlar 15 foizga — bir Gkal uchun 121 617 so‘mdan 139 860 so‘mgacha (QQSsiz) oshadi. Oxirgi marta tariflar o‘tgan yilning noyabr oyida oshirilgan edi.

Yuridik shaxslar uchun o‘sish 40 foizni tashkil etadi — bir Gkal uchun 244 497 so‘mdan 342 296 so‘mgacha. Bazaviy tarif 7 foizga (664 465 so‘mdan 711 641 so‘mgacha), budjet tashkilotlari uchun esa 18,8 foizga, 1 Gkal uchun 952 797 so‘mgacha oshiriladi.

Avvalroq Veolia Energy Tashkent bosh direktori Sevara Pardayeva kuz o‘rtalarida tarif oshishi kutilayotganini ma’lum qilgandi. Agar u ma’qullansa, 1-oktyabrga qadar aholi uchun tariflar 15 foizga, yuridik shaxslar uchun 40 foizga, budjet tashkilotlari uchun 19 foizga oshiriladi. 2019-yilda ishlab chiqilgan DXSH loyihasi shartlariga ko‘ra, tariflar har yili 30 foizga oshirilishi kerak edi.

Eslatib o‘tamiz, O‘zbekistonda 2030-yilga borib isitish va issiq suv uchun subsidiyalarni butunlay bekor qilmoqchi.

“Sohani rivojlantirish uchun subsidiyalardan voz kechish kerak. Biroq buni bir vaqtning o‘zida amalga oshirish qiyin. 2030 yilga borib subsidiyalashdan bosqichma-bosqich voz kechamiz. Buning uchun yiliga ikki marta tariflarni qayta ko‘rib chiqishimiz kerak. Tariflarni bir marta oshirish mumkin, lekin bu fuqarolarga ta’sir qiladi”, — dedi “Issiqlik ta’minoti” rahbari.

Bundan tashqari, Ilhom To‘rayev issiq suv va issiqlik ta’minoti tariflari yiliga bir yoki ikki marta qayta ko‘rib chiqilishini, bu esa subsidiyalar hajmini bosqichma-bosqich kamaytirish va aholi uchun yukni yengillashtirish imkonini berishini ta’kidladi.