Ijtimoiy karta foydalanuvchilariga xaridlar uchun keshbek ikki kun ichida qaytariladi
Jarayonni tezlashtirish uchun Soliq qo‘mitasi Iqtisodiyot vazirligi va vakolatli banklar bilan birgalikda ish olib boradi.
O‘zbekistonda ijtimoiy kartalar orqali to‘langan xaridlar uchun QQS ikki kun ichida qaytariladi, deyiladi Vazirlar Mahkamasi qarorida.
Ma’lumotlarga ko‘ra, ijtimoiy himoya yagona reyestriga kiritilgan va ijtimoiy karta orqali xarid qilgan kam ta’minlangan oilalar fuqarolariga keshbek qaytariladi. Bunda chora faqat muayyan tovarlar va xizmatlarni xarid qilishda amal qiladi. Xususan, bir oy ichida amalga oshirilgan 10 BHM (4,12 mln so‘m) gacha bo‘lgan xaridlar uchun soliq qaytariladi.
Bunda maksimal summa oyiga 494 ming so‘mni, ya’ni 12 foizni tashkil etadi. Qayd etilishicha, pul mablag‘larini qaytarishni tezlashtirish uchun Soliq qo‘mitasi kartadan mablag‘lar yechib olingan kuni Iqtisodiyot vazirligiga avtomatik tarzda shakllantirilgan soliq summasiga topshiriqnoma yuboradi. Idora, o‘z navbatida, pullarni maxsus soliq hisobvarag‘iga o‘tkazadi, shundan so‘ng vakolatli bankka to‘lovlarni oluvchilar ro‘yxati yuboriladi va bir ish kunida ularga keshbek o‘tkaziladi.
Avvalroq o‘zbekistonliklar 2025-yil uchun trillion so‘m keshbek olishi haqida xabar berilgandi. Eng ko‘p mablag‘ni Toshkent shahri va Toshkent viloyati aholisi olgan.
Izohlar