«Ўзгидромет» байрам кунлари учун об-ҳаво кутилмасини эълон қилди

Республиканинг тоғолди ва тоғли ҳудудларида 20—22 март кунлари сел-сув тошқини юзага келиши мумкин. Тоғларда қор кўчиши хавфи сақланиб туради.

«Ўзгидромет» 20—24 март кунлари учун об-ҳаво прогнозини эълон қилди.

Унга кўра, 20—22 март кунлари Ўзбекистон ҳудудига нам Ўрта Ер денгизи ҳавоси кириб келади. Республика бўйича вақти-вақти билан ёмғир ёғади, 20—21 март кунлари баъзи жойларда кучли бўлади, айрим жойларда момақалдироқ бўлиши мумкин.

20 мартда республиканинг кўпчилик ҳудудларида жуда илиқ об-ҳаво сақланиб туради. Ҳаво ҳарорати 19-24 даража илиқ атрофида, жанубда 27-29 даражагача илиқ бўлади.

21—22 март кунлари ҳарорат аста-секин пасаяди, 22 март кунига келиб 10-15 даражагача илиқ бўлади. 20—21 мартда баъзи жойларда шамол тезлиги 15-20 метр/секундгача кучайиши кутилмоқда, айрим жойларда баъзида 25-28 метр/секундгача кучайиши, чанг-тўзонлар билан кузатилиши мумкин.

23—24 март кунлари Ўзбекистоннинг барча ҳудудида ёғингарчиликсиз об-ҳаво бўлиши кутилмоқда. Ҳарорат кечалари салқинроқ 5-8 даража илиқ атрофида бўлади. Кундуз кунлари эса ҳарорат яна кўтарила бошлайди ва 17-20 даража илиқ, баъзи жойларда 22 даражагача илиқ бўлади.

Республиканинг тоғолди ва тоғли ҳудудларида 20—22 март кунлари сел-сув тошқини юзага келиши мумкин. Тоғларда қор кўчиши хавфи сақланиб туради.

Тошкентда 20 мартда кечга томон ва 21—22 март кунлари вақти-вақти билан ёмғир ёғади, момақалдироқ бўлиши мумкин. Ҳарорат 20 март куни кундузи 21-23 даража илиқ, 21 мартда 15-17 даража илиқ, 22 мартда 12-14 даража илиқ бўлади. Ҳарорат кечалари асосан 9-12 даража илиқ бўлади. 23—24 март кунлари ёғингарчилик кутилмайди. Ҳарорат кечалари 6-8 даража илиқ, кундуз кунлари 17-20 даража илиқ бўлади.

NOVA24 Instagramʼda. Obuna boʻling
Asosiy yangiliklar va qiziqarli videolar