Тошкентда Spark скутер ҳайдовчисини қасддан уриб юборди

Скутер бошқарувчиси касалхонага ётқизилди. Шаҳар ЙҲХБ йўл ҳаракати қоидаларига амал қилишга ва масофа сақлашга чақирди.

26 июнь куни кечқурун ижтимоий тармоқларда Тошкент шаҳрининг Амир Темур кўчасида Spark ҳайдовчиси скутер ҳайдовчисини қувиб кетаётиб, бир неча йўл ҳаракати қоидаларини қўпол равишда бузгани ва уни атайлаб уриб юборгани акс этган видео тарқалди.

Автобус йўлагида турган машина (рақами 01 K 316 LC) чап томонга қараб, барча йўлаклар бўйлаб скутер орқасида қувиб борган, сўнгра қарама-қарши йўлга ўтиб, уни қувиб етган. Оқибатда скутер ҳайдовчиси йиқилган.

Пойтахт Йўл ҳаракати хавфсизлиги бошқармасининг маълум қилишича, 34 ёшли Spark ҳайдовчиси Б.И. 24 ёшли Б.А бошқарувидаги скутер билан «тўқнашиб кетган». Скутер ҳайдовчиси жароҳат билан шифохонага ётқизилган.

Автомобиль ҳайдовчисига нисбатан қандай чора кўрилгани маълум қилинмаган. Бошқарма терговни бошлаганини таъкидлади ва барча ҳайдовчилардан «белгиланган қоидаларга амал қилишларини ҳамда оралиқ масофани сақлаб ҳаракатланишларини» сўради.

NOVA24 Instagramʼda. Obuna boʻling
Asosiy yangiliklar va qiziqarli videolar