Toshkentda hududida fuqaro halok bo‘lgan qurilish noqonuniy olib borilgani aniqlandi

Hozirda obyektda barcha turdagi qurilish va montaj ishlari to‘xtatilgan.

Toshkent shahri Yakkasaroy tumanidagi Askiya city turar joy qurilish maydonchasida erkak zinapoyadan yiqilib vafot etgani haqida xabar berilgandi. Qurilish vazirligining ma’lum qilishicha, ushbu qurilish noqonuniy ravishda olib borilgan.

Xususan, 2020-yil may oyida mazkur obyektda olib borilayotgan qurilish ishlari Vazirlar Mahkamasining tegishli qaroriga zid ekani aniqlangan. Ya’ni ishlar Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasini xabardor qilmagan holda va belgilangan tartibda ro‘yxatdan o‘tmagan tarzda boshlangan.

2020-yil 27-mayda inspeksiya tomonidan qurilish ishlarini to‘xtatish bo‘yicha yozma ko‘rsatma berilgan. Ma’muriy javobgarlikka tortilgan hamda qurilish-montaj ishlari to‘xtatilgan.

Lekin 2024-yil 26-aprel kuni olib borilgan qayta tekshiruv jarayonida ishlar davom etayotgani aniqlangan va qurilish mas’ullari chaqirtirilgan. Ammo ular qurilish obyektiga kelmagan va talab qilingan hujjatlar taqdim etilmagan.

Shu sababli mazkur holat yuzasidan mahalla profilaktika inspektori ishtirokida dalolatnoma rasmiylashtirilgan hamda tegishli tekshiruv ishlari yakunlangan. Holatga huquqiy baho berish uchun tegishli huquq-tartibot organlariga da’vo arizalari kiritilgan.

Bugungi kunda Toshkent shahar IIBB huzuridagi tergov boshqarmasi tomonidan ushbu obyekt bo‘yicha jinoyat ishi ochilgan. Shuningdek, obyektda barcha turdagi qurilish va montaj ishlari to‘xtatilgan.

NOVA24 Telegramʼda. Obuna boʻling
Tezkor xabarlar va asosiy voqealar