Yevropa Ittifoqi Alisher Usmonovning singlisini sanksiyalar ro‘yxatidan chiqarishni rejalashtirmoqda

Qayd etilishicha, Yevropa Ittifoqi Gulbahor Ismoilovadan tashqari Vengriya himoyasidagi yana ikki rossiyalikni sanksiyalar ro‘yxatidan chiqarishi kutilmoqda.

Vengriya o‘z himoyasidagi uch kishini Yevropa Ittifoqi sanksiyalari ro‘yxatidan chiqarishga erishishi mumkin. Bu haqda “Bloomberg” xabar berdi.

Manbalarga ko‘ra, quyidagi shaxslar sanksiyalar ro‘yxatidan chiqarilishi kutilmoqda:

1. Gulbahor Ismoilova — Alisher Usmonovning singlisi bo‘lib, uning xorijdagi ba’zi aktivlariga egalik qilishi taxmin qilinadi. 2022-yil 8-aprelda sanksiyalar ro‘yxatiga kiritilgan.
2. Vyacheslav Moshe Kantor — tadbirkor, Yevropa Yahudiy Kongressining sobiq rahbari. 2022 yil 8 apreldan buyon sanksiyalari ostida bo‘lib, “Vladimir Putin bilan yaqin aloqalarga ega rossiyalik oligarx” sifatida tilga olingan.
3. Mixail Degtyaryov — Rossiya Sport vaziri. Unga qarshi Yevropa Ittifoqi sanksiyalari 2014-yil 25-iyulda joriy qilingan. O‘sha paytda u Davlat Dumasi deputati bo‘lib, DNRni ochiq qo‘llab-quvvatlagan va Moskvada uning elchixonasi ochilganini e’lon qilgan.

Yevropa Ittifoqi diplomatlarining so‘zlariga ko‘ra, rasmiy qaror yaqin orada qabul qilinishi kutilmoqda.

Bundan tashqari, hozirda Yevropa Ittifoqi davlatlari ikki mingdan ortiq rossiyaliklarga nisbatan sanksiyalarni yarim yilga uzaytirish bo‘yicha kelishuvga yaqin ekani aytilmoqda.

“Bloomberg” nashrining xabar berishicha, tadbirkorlar Mixail Fridman va Alisher Usmonovni sanksiyalar ro‘yxatidan chiqarishni talab qilgan Vengriya, oxir-oqibat sanksiyalarni uzaytirishga rozilik bildirgan.

NOVA24 TikTokʼda. Obuna boʻling
Asosiy yangiliklar va qiziqarli videolar