Toshkentda 64 yoshli ayol mashina urib ketishi oqibatida halok boʻldi

Yunusobod tumanida Spark tartibga solinmagan piyodalar o’tish joyidan yo’lni kesib o’tayotgan piyodani urib yubordi. Oqibatda jabrlanuvchi shifoxonada vafot etdi.

Kecha, 19-iyul kuni Toshkent shahri Yunusobod tumanida sodir bo‘lgan yo‘l-transport hodisasida piyoda halok bo‘ldi. Bu haqda poytaxt YHXB axborot xizmati xabar berdi.

Qayd etilishicha, YTH soat 20:30 larda Ahmad Donish ko‘chasida yuz bergan. Haydovchi D.R. (2004-yilda tug‘ilgan, erkak) Spark avtomashinasini boshqarib ketayotib, tartibga solinmagan piyodalar o‘tish joyidan yo‘lni kesib o‘tayotgan piyoda G. Sh.ni (1960-yilda tug‘ilgan, ayol) urib yuborgan.

Oqibatda piyoda shifoxonada vafot etgan.

Holat yuzasidan Jinoyat kodeksining 266-moddasi 2-qismi (Odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atildi. Tergov davom etmoqda.

NOVA24 TikTokʼda. Obuna boʻling
Asosiy yangiliklar va qiziqarli videolar