Toshkent viloyatida noqonuniy qum-shag‘al qazilishi tufayli tabiatga 87 mlrd so‘mdan ortiq zarar yetkazildi

Ish yuzasidan hujjatlar holatga huquqiy baho berish uchun huquqni muhofaza qilish organlariga yuborildi.

Toshkent viloyati Ekologiya boshqarmasi, viloyat Milliy gvardiya xodimlari, viloyati Ichki ishlar boshqarmasi hamda huquqni muhofaza qilish organlari bilan hamkorlikda Bekobod tumani “Achamayli” MFY hududidan oqib otuvchi Sirdaryo daryosida ekologik nazorat tadbirlari olib borildi. Bu haqda Ekologiya vazirligi matbuot xizmati xabar berdi.

Maʼlum qilinishicha, reyd davomida daryoning chap qirg‘og‘idan davlat raqami yechib olingan texnika vositasi (yuklagich) yordamida ishlov berilmagan qum, qum-shag‘al aralashmalari Hovo hamda “ZIL” yuk tashish avtotransport vositalariga yuklanib, olib chiqib ketilayotganligi aniqlandi.

Qum-shag‘al qazib olinish natijasida tabiatga 87 milliard 651 million 83 ming 344 so‘m zarar yetkazilganligi maʼlum bo‘ldi.

Uchta yuk tashuvchi avtotransport vositasi vaqtinchalik saqlab turish uchun Bekobod shahar hududidagi jarima maydonchasiga joylashtirildi.

Ish yuzasidan hujjatlar holatga huquqiy baho berish uchun huquqni muhofaza qilish organlariga yuborildi.

NOVA24 TikTokʼda. Obuna boʻling
Asosiy yangiliklar va qiziqarli videolar