Toshkent shahrida aholining ichimlik suvi bilan ta’minlanganlik darajasi 98,6 foizga, markaziy kanalizatsiya bilan ta’minlanganlik darajasi esa 98,6 foizga yetdi.
“Toshkent shahar suv ta’minoti” matbuot xizmatining ma’lum qilishicha, bir yil ichida tozalash tizimidan 672 million kub metr suv o‘tgan. Qayd etilishicha, umumiy uzunligi to‘rt ming kilometrdan ortiq bo‘lgan tarmoq orqali 771 mingdan ortiq iste’molchiga resurs yetkazib berilgan. Bundan tashqari, “Salar”, “Bo‘zsuv” va “Bektemir” tozalash inshootlari tomonidan 556 million kub metr oqova suv qabul qilindi va qayta ishlandi.
Hududlar kesimida oladigan bo‘lsak, Yunusobod tumanidagi 5 ta mahallaga 11 kilometr yangi quvur tortilib, 4 ming 100 nafar aholi markaziy oqova suv tarmog‘iga ulandi. Yangihayot tumanida suv hisobini raqamlashtirish ishlari davom etmoqda. Mutaxassislar Fransiyaning SUEZ kompaniyasi bilan hamkorlikda allaqachon 50 mingta “aqlli” hisoblagichlarni o‘rnatgan.
Loyiha 2031-yilgacha mo‘ljallangan bo‘lib, real vaqt rejimida iste’molni kuzatish va sizib chiqish joylarini tezkor aniqlash imkonini berishi kerak. Bundan tashqari, mutaxassislar quyosh energiyasidan foydalanishni boshladilar. Qayd etilishicha, korxonaning asosiy obyektlariga o‘rnatilgan fotopanellar yiliga 1 million kilovatt-soatdan ortiq elektr energiyasini tejash imkonini beradi.
Shuningdek, mutaxassislar joriy kuz-qish mavsumiga tayyorgarlik ko‘rish jarayonida poytaxtda qariyb 60 kilometr suv va kanalizatsiya tarmoqlari ta’mirlangani, 25 mingta avariya bartaraf etilganini ma’lum qildi. Kompaniya kelgusida yangi mahallalarni markazlashgan kanalizatsiya tizimiga ulash, eski nasoslarni zamonaviy energiya tejamkor agregatlarga keng ko‘lamda almashtirish va avariya xavfini kamaytirish uchun quvurlarning eskirgan qismlarini yangilashni davom ettirishni rejalashtirmoqda.
Avvalroq O‘zbekistonda GESlarda elektr energiyasi ishlab chiqarish kamaygani haqida xabar berilgandi. Energetika vazirligi rahbari suv tanqisligini ishlab chiqarish pasayishining asosiy sababi deb atadi.
