Surxondaryoda “O‘zsuvta’minot”ning uch xodimi qutqarildi

Qumqo‘rg‘on tumanida quduq ichida hushini yo‘qotgan suv ta’minoti korxonasining uch xodimi qutqarib olindi.

Surxondaryo viloyati Qumqo‘rg‘on tumanida oqova suv qudug‘i ichida hushidan ketib qolgan uch nafar xodim qutqarilgan. “Surxondaryo suv ta’minoti” AJ matbuot kotibining xabar berishicha, hodisa 2024 yil 4 oktyabr kuni yuz bergan.

Qumqo‘rg‘on suv ta’minoti bo‘limida faoliyat olib borayotgan uch nafar texnik xodim Qumqo‘rg‘on tumani Do‘stlik mahallasida joylashgan oqova suv qudug‘ini tozalash jarayonida havo yetishmovchiligi sababli hushidan ketgan.

Voqea joyiga Qumqo‘rg‘on tumani Favqulodda vaziyatlar bo‘limi va tuman tez tibbiy yordam guruhi zudlik bilan yetib kelgan.

Ko‘rilgan tezkor choralar natijasida xodimlar mas’ul tashkilotlar hamda jamoatchilik vakillari yordamida quduqdan chiqarilib, birinchi yordam ko‘rsatish uchun tuman tez tibbiy yordam bo‘limiga yetkazilgan.

Dastlabki ma’lumotlarga ko‘ra, ularning hayoti saqlab qolingan bo‘lib, hozirda shifokorlar nazoratida tibbiy muolajalar olib borilmoqda.

Ushbu hodisaga o‘z vaqtida e’tibor qaratib, fuqarolarning xavfsizligini ta’minlashga hissasini qo‘shgan jamoatchilik va mas’ul tashkilotlar vakillariga “Surxondaryo suv ta’minoti” AJ o‘z minnatdorchiligini bildiradi, deyiladi xabarda.

NOVA24 YouTubeʼda. Obuna boʻling
Asosiy yangiliklar va qiziqarli videolar