Shavkat Mirziyoyev Turkiy davlatlar tashkiloti sammitida nutq so‘zladi — asosiylar

Shavkat Mirziyoyev Turkiy davlatlar tashkiloti sammitida so‘zga chiqib, Turkiy davlatlar iqtisodiy hamkorligi bo‘yicha doimiy kengash tuzishni taklif etdi. Shuningdek, u turkiy dunyoning birligini mustahkamlash hamda uning jahon siyosati, iqtisodiyoti va gumanitar sohalardagi o‘rnini yuksaltirishga qaratilgan bir qator muhim tashabbuslarni ilgari surdi. Bu haqda prezident matbuot xizmati xabar berdi.

Davlat rahbari o‘z nutqida mamlakatimiz savdo-iqtisodiy aloqalarni rivojlantirish va sanoat kooperatsiyasini chuqurlashtirishga asosiy yo‘nalish sifatida qarayotganini ta’kidladi. Shu munosabat bilan amaliy hamkorlikni izchil rivojlantirish va aniq loyihalarni ishlab chiqish maqsadida davlatimiz rahbari Turkiy davlatlar iqtisodiy hamkorlik bo‘yicha doimiy kengashini tuzishni taklif etdi.

Davlat rahbari Kengashning Loyiha ofisini Toshkent shahrida joylashtirish mumkinligini ta’kidladi. Shu bilan birga, ushbu tuzilma mamlakatlar Bosh vazirlari o‘rinbosarlari tomonidan boshqarilishi va doimiy asosda faoliyat yuritishi kerakligi ta’kidlandi. Bundan tashqari, mamlakat yetakchisi mintaqaviy va global xavfsizlik masalalari bo‘yicha yondashuvlarni kelishish maqsadida Samarqand shahrida tashqi ishlar vazirlari va TDT maxsus xizmatlari rahbarlarining birinchi qo‘shma uchrashuvini o‘tkazish tashabbusini ilgari surdi.

Shuningdek, prezident Strategik sheriklik, abadiy do‘stlik va qardoshlik to‘g‘risidagi shartnomani tez fursatda qabul qilishni qo‘llab-quvvatladi hamda Turkiy davlatlar tashkilotini 2030-yilgacha rivojlantirish strategiyasi va alohida «yo‘l xaritasi»ni ishlab chiqishni taklif qildi. Bundan tashqari, prezident organik qishloq xo‘jaligi bo‘yicha Ekspert guruhini tuzish va turkiy organik mahsulotlarning yagona brendini jahon bozoriga olib chiqishni taklif qildi.

Iqtisodiyot sohasida mamlakat yetakchisi Turkiy investitsiya jamg‘armasi faoliyatini kengaytirish hamda xalqaro va milliy moliya institutlari bilan hamkorlik dasturini qabul qilish, shuningdek, Yangi iqtisodiy imkoniyatlar makonini shakllantirish, shu jumladan Turkiy davlatlar sanoat alyansi, «Turkiy yashil yo‘laklar» tizimi va «Yashil transformatsiya» konsorsiumini tashkil etish tashabbusini ilgari surdi.

Texnologiyalar sohasida ham prezident “Sun’iy intellekt va kreativ iqtisodiyot bo‘yicha yo‘l xaritasi”ni qabul qilishni taklif qildi. Davlat rahbari san’atga e’tibor qaratib, O‘zbekistonda Turkiy dunyo xalqaro ko‘rgazmasini o‘tkazish, shuningdek, 2026-yilda “Nizomiy Ganjaviy va Alisher Navoiy ijodi turkiy dunyo ma’naviyatida” mavzusida xalqaro konferensiya tashkil etish g‘oyasini ilgari surdi.

Bundan tashqari, prezident ekstremistik va radikal mafkuraga qarshi kurashish bo‘yicha Harakatlar rejasi hamda yoshlar o‘rtasida yot va buzg‘unchi g‘oyalar tarqalishining oldini olish uchun yoshlarni ekologik ma’rifatli qilish tashabbusini ilgari surdi.

Avvalroq O‘zbekiston “Turkiy dunyo” birligi tarafdori ekani xabar qilingandi. Respublika Turkiy davlatlar tashkilotini isloh qilish bo‘yicha loyihalarni oldinga surmoqda.