Raqobat qo‘mitasi manipulyatsiya harakatlarini sodir etgan korxonaga chora ko‘rildi

Shaffof sement sanoat’ga manipulyatsiya harakatlarini sodir etgani uchun chora ko‘rildi.

Raqobatni rivojlantirish va iste’molchilar huquqlarini himoya qilish qo‘mitasi “Shaffof sement sanoat” MChJ qo‘shma korxonasiga nisbatan manipulyatsiya harakatlarini sodir etgani uchun ta’sir chorasi qo‘llanganini ma’lum qildi.

Qo‘mitaning Farg‘ona viloyati hududiy boshqarmasi tomonidan o‘tkazilgan monitorningda Shaffof sement sanoat tomonidan 2023-yil yanvar-dekabr va 2024-yil yanvar-iyul oylarida 298 ta holatda 20 ming 645 tonna sement birja savdolariga qo‘yilmasdan to‘g‘ridan-to‘g‘ri shartnomalar orqali sotilgani aniqlangan.

Shuningdek, mahsulot sotilgan kunlardagi narxlar 2023−2024-yillar davomida birja savdolarida shakllangan o‘rtacha birja kotirovka narxlari bilan taqqoslangan. 298 ta holatda mahsulot narxlarini yuqori qo‘llash natijasida jami 669 mln so‘mga yaqin miqdorda tafovut (farq) holati aniqlangan.

Qo‘mitaning qayd etishicha, Vazirlar Mahkamasining 170-sonli qarori bilan tasdiqlangan nizomga muvofiq, “Yuqori likvidli va (yoki) monopol mahsulotlarni to‘g‘ridan-to‘g‘ri shartnomalar bo‘yicha sotish” harakatlari manipulyatsiya deb hisoblanadi.

Yuqoridagilarga muvofiq, Farg‘ona viloyati hududiy boshqarmasining maxsus komissiyasi tomonidan “Raqobat to‘g‘risida”gi qonunning 29-moddasi talablari buzilishi alomatlari bilan Shaffof sement sanoat qo‘shma korxonasiga nisbatan ish qo‘zg‘atilib, natijasi yuzasidan belgilangan tartibda tegishli ta’sir chorasi qo‘llanilgan.

NOVA24 YouTubeʼda. Obuna boʻling
Asosiy yangiliklar va qiziqarli videolar