Qurilish vazirligi qurilishga ruxsat berish uchun “qo‘shimcha xarajatlar” haqidagi bayonotga munosabat bildirdi

Qurilish va uy-joy kommunal xo‘jaligi vazirligi tadbirkor Usmonjon Abdusamatovning ruxsatnoma olish jarayonida asossiz rad etishlar va korrupsiya holatlari mavjudligi haqidagi so‘zlariga izoh berdi.

Tadbirkor qurilish sohasi vakillari ishtirokidagi ochiq muloqotda voqeani so‘zlab berdi.

Biz uchastka sotib oldik, keyin ruxsat olishimiz kerak. Ariza topshiramiz — rad etiladi. Yana bir marta topshiramiz – yana rad javobi. Manzilga kelib, “assalomu alaykum” demaguningizcha (keyin u pul uzatishga taqlid qilgan imo-ishorani ko‘rsatdi). Bu ochiq gapirish kerak bo‘lgan voqelik. Bu esa ertangi xarajatlarga bevosita ta’sir qiladi, — dedi u.

Uning so‘zlariga ko‘ra, Toshkent shahrida ruxsatnoma olish va kadastrdan o‘tish bilan bog‘liq qo‘shimcha “xarajatlar” bitta uy uchun 200 ming dollargacha, Toshkent viloyatida esa 100 ming dollargacha yetishi mumkin.

Qurilish vazirligining ma’lum qilishicha, qurilish sohasidagi barcha davlat xizmatlari va to‘lovlar faqat elektron shaklda, shu jumladan my.gov.uz portali va Davlat xizmatlari markazlari orqali amalga oshiriladi. Bunda barcha bosqichlarda ariza beruvchi va vakolatli organ vakili o‘rtasidagi har qanday o‘zaro hamkorlik istisno etiladi.

Qurilish vazirligi so‘nggi yillarda byurokratiyani kamaytirish, inson omilini minimallashtirish va korrupsiyaviy xavf-xatarlarning oldini olishga qaratilgan islohotlar amalga oshirilayotganini eslatdi.

Obyekt qurilishiga ruxsat olishdan boshlab uni foydalanishga qabul qilib olishgacha bo‘lgan barcha jarayonlar “Shaffof qurilish” milliy axborot tizimi orqali to‘liq nazorat qilinadi, — deyiladi bayonotda.

Qurilish sohasida shaffoflikni ta’minlash, ortiqcha byurokratiyani kamaytirish, biznes va fuqarolarga qulaylik yaratish maqsadida qurilish sohasidagi davlat xizmatlarini raqamlashtirish bosqichma-bosqich davom ettirilmoqda.

Bundan tashqari, prezidentning 2023-yil 26-iyuldagi qarori va hukumatning 2024-yil 25-martdagi qaroriga muvofiq, Toshkent shahrida qurilish hajmining har bir kub metri uchun bazaviy hisoblash miqdorining bir baravari miqdorida yig‘im joriy etildi.

Yig‘im shaharda qurilayotgan yoki rekonstruksiya qilinayotgan obyektlarga nisbatan tatbiq etiladi, bundan quyidagilar mustasno:

• byudjetdan moliyalashtiriladigan obyektlar,
• yakka tartibdagi uy-joylar,
• nodavlat bolalar bog‘chalari va maktablari.

Vazirlikning aniqlik kiritishicha, barcha tushumlar to‘liqligicha hokimlik huzuridagi Toshkent shahrini rivojlantirish jamg‘armasiga o‘tkaziladi.

Shuningdek, vazirlik qurilish sohasida korrupsiyaga duch kelgan tadbirkorlar va fuqarolarni vazirlik va uning hududiy boshqarmalarining komplayens-bo‘limlariga murojaat qilishga chaqirgan. Vazirlik qurilish sohasida shaffoflik, qonuniylik va ochiqlikni ta’minlashni ustuvor vazifa sifatida ko‘rishini va muloqot uchun ochiqligini bildirdi.