Qurib borayotgan “Furqat” bog‘iga aholining shikoyatlaridan so‘ng hokim tashrif buyurdi
Anvar Sayfutdinov bog‘ rahbariyatini tanqid qilib, vaziyatga tezroq oydinlik kiritish bo‘yicha topshiriq berdi.
Mirobod tumani hokimi Anvar Sayfutdinov juda achinarli ahvolga kelib qolgan “Furqat” bog‘iga tashrif buyurdi, deb xabar bermoqda tuman hokimligi axborot xizmati.
Ma’lumotlarga ko‘ra, hokimga SES, FVB, kadastr xizmati, ekologiya inspeksiyasi va boshqa nazorat organlari hamrohlik qilgan. Mutasaddi uning ahvoli qoniqarsizligi haqida aholining ko‘plab shikoyatlariga javoban hududga tashrif buyurdi. Qayd etilishicha, so‘nggi yillarda bog‘dagi yo‘laklar buzilib, sug‘orish ishlari to‘xtab qolgan, maysazorlar ham abgor ahvolda.
Shu munosabat bilan hokim bog‘ ijarachilarini harakatsizlik uchun tanqid qildi va ularga “so‘nggi ogohlantirish” berdi. Shuningdek, ularga aniq vazifalar, xususan, sug‘orish tizimini 3 kun ichida tiklash, aniqlangan qoidabuzarliklarni 2 hafta ichida bartaraf etish, shuningdek, kirish joyida mas’ul shaxslarning aloqalari bilan hududning dolzarb sxemasini o‘rnatish topshirildi.
Tuman hokimligi ish ustidan nazorat har kuni olib borilishini, talablar bajarilmagan taqdirda qat’iy ma’muriy choralar ko‘rilishini ta’kidladi. Qayd etilishicha, avvalroq ma’muriyat ijarachilar bilan suhbatlar o‘tkazgan, biroq vaziyat o‘zgarmagan. Aholi bu gal ham bog‘ yaxshi holatga keltirilib, shahar aholisining dam olishi uchun qulay maskanga aylantirilishiga umid bildirdi.
Avvalroq Toshkentning Yakkasaroy tumani hokimi Anvar Sayfutdinovning shaxsan o‘zi “Moviy gumbazlar” xiyoboniga kelib, tartibsizliklarni bartaraf etgani haqida xabar berilgandi. Anvar Sayfutdinov bundan buyon tozalik va tartibga doimiy rioya qilinishiga va’da berdi, buning uchun maxsus ishchi guruh tuzilgan.
Izohlar