O‘zbekistonliklar sifatsiz tovarlarni aniqlagani uchun mukofotlanadi
Xavfli mahsulotlardan jabrlanganlarga yetkazilgan zarar qoplanadi.
O‘zbekistonda sifatsiz va xavfli tovarlarni aniqlashga yordam beradigan fuqarolar uchun yangi mukofotlash tizimini joriy etish rejalashtirilmoqda, deyiladi normativ-huquqiy hujjatlar loyihalari muhokamasi portalida.
“Bozor nazorati to‘g‘risida”gi qonun loyihasi 21-avgust kuni jamoatchilik muhokamasiga qo‘yildi. Hujjatga ko‘ra, Vazirlar Mahkamasiga to‘rt oy muddatda qoidabuzarliklar haqida xabar bergan fuqarolarni moddiy rag‘batlantirish tartibini tasdiqlash topshirildi. Hujjatda, shuningdek, sifatsiz mahsulotlardan zarar ko‘rganlarga kompensatsiya to‘lash ko‘zda tutilgan.
Vafot etgan taqdirda moddiy zararning to‘liq summasidan kam bo‘lmagan miqdorda, nogiron bo‘lib qolgan taqdirda — ushbu summaning kamida yarmini, sog‘liqqa boshqacha tarzda zarar yetkazilgan taqdirda — beshdan bir qismidan kam bo‘lmagan miqdorda to‘lanadi. Tovarlarning xavfsizligini nazorat qilish nazorat xaridlari, ekspertizalar, shikoyatlarni tahlil qilish va mahsulotlarning standartlarga muvofiqligini tekshirish orqali amalga oshiriladi.
Qonunbuzarliklar aniqlanganda, tovarlar bozordan 15 ish kunidan kechiktirmay olib tashlanishi kerak. Loyihaning jamoatchilik muhokamasi 5-sentyabrgacha davom etadi. Qonun 2026-yil 1-iyuldan kuchga kirishi mumkin.
Eslatib o‘tamiz, Toshkent aholisiga sifatsiz tovarlar va xizmatlar uchun milliardlab mablag‘lar qaytarildi. Toshkentliklar eng ko‘p umumiy ovqatlanish va savdo-sotiqdan shikoyat qilishgan.
Izohlar