O‘zbekistonliklar avtomobil sotib olishga shoshilmoqda — tahlil
Avtomobil bozori faolligi barcha segmentlarda oshdi.
O‘zbekistonda avtomobil bozori faolligi barcha segmentlarda o‘sib, 2024-yil yanvar oyidan beri maksimal darajaga yetdi, deyiladi ITIM ma’lumotida.
Ma’lumotlarga ko‘ra, 2025-yil iyul oyida sotilgan avtotransport vositalari hajmi 116,8 ming donani tashkil etib, 2024-yilning shu davriga nisbatan 27 foizga oshgan. Shu bilan birga, bu ko‘rsatkich 2024-yil yanvar oyidan beri eng yuqori ko‘rsatkichdir.
Yengil avtomobillar
Yengil avtomobillar segmentida iyul oyida sotuvlarning tezlashishi, iste’mol faolligining tiklanishi va talabning mintaqaviy diversifikatsiyasi qayd etildi. Xususan, yengil avtomobillar savdosining umumiy hajmi qariyb 100 ming donani tashkil etdi, bu o‘tgan oyga nisbatan 25 foizga ko‘pdir.
Shu bilan birga, mutaxassislar eng yorqin ijobiy dinamikani Toshkent viloyatida qayd etdilar, bu yerda sotuvlar 51 foizga oshdi. Keyingi o‘rinlarni mos ravishda 49% va 40% o‘sish ko‘rsatkichlari bilan Namangan va Xorazm viloyatlari egalladi.
Yangi avtomobillar
Yangi yengil avtomobillar segmentida ham faollik kuchaydi. Umumiy savdo hajmi iyun oyiga nisbatan 38,2 foizga o‘sib, 38,4 ming donani tashkil etdi. Segment ichida mahalliy ishlab chiqarilgan yangi yengil avtomobillar ustun mavqeni saqlab qolib, sotuv hajmi 38,6 foizga o‘sib, 32,9 ming donaga yetdi. Xorijiy avtomobillar savdosi ham ijobiy dinamikani ko‘rsatib, 5,4 ming donani tashkil etdi, bu iyun oyiga nisbatan 35,8 foizga yuqori.
Ikkilamchi avtomobil bozori
Yengil avtomobillarning ikkilamchi bozorida ham sotuvlar hajmi oshib, 61,5 ming donani tashkil etdi. Qayd etilishicha, bu iyun oyidagi ko‘rsatkichdan 18 foizga ko‘p.
Elektromobillar bozori
Iyul oyida yengil elektromobillar savdosi 2025-yilning iyun va may oylariga nisbatan jadal sur’atlarni namoyish etib, rekord darajadagi 6,5 ming donaga yetdi, bu iyun oyiga nisbatan 28,2 foizga ko‘pdir.
Avvalroq Volkswagen O‘zbekistonda avtomobil yig‘ishni boshlashi haqida xabar berilgandi. Kompaniya o‘rta sinf vakillari mashinalariga qiziqish bildiradi deb umid qilmoqda.
Izohlar