O‘zbekistonda xotin-qizlarga tazyiq va zo‘ravonlik holatlari keskin ortmoqda
Ko‘rsatkichning o‘sishi huquqiy xabardorlikning oshishi va xotin-qizlar huquqlariga rioya etilishini faol talab qilish bilan izohlandi.
2025-yil boshidan buyon O‘zbekistonda ayollarga nisbatan tazyiq va zo‘ravonlik holatlari 48,3 mingtani tashkil etib, o‘tgan yilgi ko‘rsatkichdan 121 foizga oshdi. Ichki ishlar vaziri o‘rinbosari Bekmurod Abdullayev bunday statistikaning sababini ayollarning huquqiy savodxonligini oshirish va huquqlarga rioya etilishini faol talab qilish bilan izohladi.
Ma’lumotlarga ko‘ra, 2025-yilda ayollarga nisbatan zo‘ravonlik holatlari soni kuniga o‘rtacha 265 ga yaqin hodisani tashkil etgan. Shu bilan birga, eng ko‘p holatlar Toshkent viloyatida — 9,4 ming, Buxoro — 5,6 ming, Qashqadaryo — 5,2 ming va Andijon — 4,8 ming holatda qayd etilgan.
Bundan tashqari, yil boshidan buyon mamlakatda 41 051 nafar ayolga himoya orderi berilgan. Bunday statistikadan xavotirga tushgan Senatning Yoshlar, xotin-qizlar, madaniyat va sport masalalari qo‘mitasi a’zosi Malika Qodirxonova Oila va xotin-qizlar qo‘mitasi raisi Zulayho Mahkamovaga zo‘ravonlik sabablarini aniqlash, bunday holatlarning oldini olish bo‘yicha qanday choralar ko‘rilayotganiga oydinlik kiritishni so‘rab so‘rov yubordi.
Ichki ishlar vaziri o‘rinbosari Bekmurod Abdullayevning aytishicha, xotin-qizlar murojaatlarining ko‘payishi ularning o‘z huquqlarini yaxshiroq bilishi bilan bog‘liq.
“Ochiq tushuntirish ishlarini olib boryapmiz, shu orqali ayollar ko‘proq yordam so‘rashyapti. Ilgari ko‘pchilik zulmga chidagan, hozir esa ular himoya borligini va unga tayanish mumkinligini tushunishadi”, — dedi vazirlik vakili.
Shuningdek, mamlakatimizda xotin-qizlarni himoya qilish bo‘yicha uch darajali “mahalla — tuman — viloyat” tizimi yaratilgani ta’kidlandi. Bundan tashqari, mutaxassislar tomonidan olib borilayotgan profilaktik va ijtimoiy tadbirlar natijasida 29 mingdan ortiq oilada nizolarning kelib chiqish sabablari bartaraf etildi, 23 mingdan ortiq oilaning muammolari hal etilib, tomonlar yarashtirildi.
Avvalroq O‘zbekistonda tazyiq va oilaviy zo‘ravonlik uchun minglab odamlar jazolangani haqida xabar berilgan edi. Qoidabuzarlarning ba’zilari jarima bilan qutulib qolishdi.
Izohlar