O‘zbekistonda xorijliklar davlat xizmatlari portali orqali vizani onlayn tarzda uzaytirishi mumkin bo‘ladi
Murojaat qilish uchun vizani uzaytirish asoslarini tasdiqlovchi hujjat taqdim etish kerak bo‘ladi.
O‘zbekistonda xorijiy fuqarolar uchun Yagona interaktiv davlat xizmatlari portali orqali onlayn rejimda bo‘lish vizalarini uzaytirish funksiyasi paydo bo‘ldi, deb xabar bermoqda YIDXP matbuot xizmati.
Ma’lumotlarga ko‘ra, endilikda mamlakat hududida bo‘lib turgan chet elliklar va fuqaroligi bo‘lmagan shaxslar mamlakatda bo‘lish muddatini uzaytirish uchun onlayn ariza topshirishlari mumkin bo‘ladi. Xizmatdan “Fuqarolik” bo‘limida foydalanish mumkin. Undan foydalanish uchun ariza beruvchi shaklni to‘ldirishi va unga pasport nusxasini, shuningdek, vizani uzaytirish asoslarini tasdiqlovchi hujjatni ilova qilishi kerak bo‘ladi.
Bunda viza muddati tugashidan kamida 10 kun oldin ariza topshirish mumkin bo‘ladi. Shuningdek, O‘zbekiston fuqarolari — viza muddatini uzaytirish istagida bo‘lgan chet el fuqarosining yaqin qarindoshlari yoki ishonchli vakillari ham ariza topshirishlari mumkin. Bunday holatda murojaat qilinganda notarial tasdiqlangan ishonchnomani ilova qilish talab etiladi.
Murojaatdan so‘ng 15 kun ichida ariza IIV Migratsiya va personallashtirish departamenti tomonidan ko‘rib chiqiladi va ijobiy javob olingan taqdirda ariza beruvchiga davlat boji to‘langanligi to‘g‘risida kvitansiya yuboriladi. Barcha xarajatlar to‘langandan so‘ng fuqaro uch ish kuni ichida pasportni mahalliy migratsiya boshqarmasiga taqdim etishi kerak bo‘ladi va ikki ish kunidan kechiktirmay pasportni ruxsatnoma stikeri bilan qaytarib olishi mumkin bo‘ladi.
Izohlar