O‘zbekistonda paxtachilikda ustoz-shogirdlik tizimi joriy etiladi
Rasmiylar biriktirilgan qishloq xo‘jaligi xodimlarining ko‘rsatkichlarini yaxshilay olgan tajribali fermerlarga pul mukofoti berishni rejalashtirmoqda.
O‘zbekiston paxta yetishtirishda ustozlik tizimini joriy etishni rejalashtirmoqda, bunda tajribali fermerlar hamkasblariga yordam berish uchun biriktiriladi, deb xabar beradi prezident matbuot xizmati.
Qishloq xo‘jaligi mamlakatimiz iqtisodiyotida muhim o‘rin egallaydi. Sohaning iqtisodiyotdagi ulushi 20 foizni tashkil etmoqda, unda yiliga 467 trillion so‘mlik mahsulot yaratilmoqda, 3,5 million kishi mehnat qilmoqda. Shu bilan birga, meva-sabzavot, yangi va qayta ishlangan agrar mahsulotlar umumiy eksportning uchdan bir qismini ta’minlamoqda.
Taqdimotda paxtachilikda hosildorlikni oshirish masalalari atroflicha ko‘rib chiqildi. Buning uchun past hosil olayotgan fermerlar bilan manzilli ishlash, ilg‘or agrotexnologiyalar va oziqlantirish amaliyotlarini to‘g‘ri joriy etish, agronom tayyorlash tizimini tubdan isloh qilish choralari belgilab olindi. Jumladan, paxtachilikda ustoz-shogird an’analarini yo‘lga qo‘yish orqali hosildorlikni 60 sentnerdan oshirgan ilg‘or fermerlarni 30 sentnerdan kam hosil olgan fermerlarga biriktirish taklif qilindi.
Agronomlarni tayyorlash tizimini takomillashtirish maqsadida Agrar universitet va sohada agronomlarni tayyorlaydigan boshqa oliygohlar bitiruvchilari uchun ikki yillik “dual ta’lim” mexanizmi joriy etiladi. Ilg‘or klaster va fermer xo‘jaliklarida amaliyot o‘tagan talabalarga stipendiya, ularni o‘qitgan mutaxassislarga esa rag‘bat puli to‘lanadi.
Avvalroq O‘zbekiston ekinlarni sug‘urtalashni boshlashi haqida xabar berilgan edi. Shuningdek, hukumat Agrar sohada to‘lov agentligini tashkil etishni rejalashtirmoqda.
Izohlar