O‘zbekistonda korxonalar havo va chiqindilar monitoringi stansiyalarini o‘rnatishga majbur bo‘ladi
Shuningdek, hukumat atrof-muhitga yetkazilgan zararni qoplash bo‘yicha barcha imtiyozlarni bekor qiladi.
O‘zbekistonda 2026-yildan boshlab barcha korxonalar fon monitoring stansiyalarini o‘rnatishga majburlanadi va buni qilmaganlar uchun jarimalar 5 baravar oshiriladi, shuningdek, tabiatga zarar yetkazganlik uchun imtiyozlar bekor qilinadi, deyiladi prezident qarorida.
Ma’lumotlarga ko‘ra, mamlakatda atrof-muhitga ta’siri bo‘yicha I va II toifadagi sanoat korxonalari 2026-yil 1-martga qadar o‘z hududlarida fon monitoring stansiyalarini o‘rnatishi va ularni Ekologiya qo‘mitasining Milliy ekologik monitoring markazi bilan integratsiya qilishi kerak. Shu bilan birga, ushbu muddatgacha talablarni bajarmagan muassasalar uchun kompensatsiya to‘lovlari 5 baravarga oshiriladi.
Shuningdek, 2026-yil 1-martdan boshlab tabiatga yetkazilgan zarar uchun kompensatsiya to‘lashdan ozod qilish va imtiyozlar berish bilan bog‘liq barcha hujjatlar bekor qilinadi. Shuningdek, mamlakatda ekologiya sohasidagi qonun hujjatlari talablariga rioya etilishini istisno qiluvchi yoki ularga rioya etmaslikka ruxsat beruvchi hujjatlarni berish qat’iyan taqiqlanadi. Ular qatoriga ekologik ekspertizalar, shuningdek, daraxtlar va butalarni kesish va ko‘chirib o‘tkazishni nazarda tutuvchi qarorlar, farmoyishlar yoki bayonnomalar ham kiradi.
Avvalroq O‘zbekistonda aholi daraxt kesish bilan bog‘liq har qanday qurilishni to‘sib qo‘yishi mumkinligi haqida xabar berilgandi. Buning uchun mahalla aholisining bor-yo‘g‘i 10 foizining roziligini olish kerak bo‘ladi.
Izohlar