O‘zbekistonda avtomobillar uchun “yashil” va “qizil” yo‘laklarga ega nazorat-o‘tkazish punktlari joriy etiladi
Yangi tizim orqali post orqali yiliga 1 ming 500 dan ortiq avtomobil va kuniga 50 mingdan ziyod yo‘lovchi o‘tkaziladi.
O‘zbekiston va Qozog‘iston chegarasida joylashgan bojxona postida avtomobillar uchun “yashil” va “qizil” yo‘laklar joriy etiladi, deb xabar bermoqda Bojxona qo‘mitasi matbuot xizmati.
Ma’lumotlarga ko‘ra, gap ikki davlat chegarasida joylashgan “G‘ishtko‘prik” bojxona posti haqida ketmoqda. 17 noyabr kuni hududga Bojxona qo‘mitasi raisi Akmalxo‘ja Mavlonov tashrif buyurdi. Mutaxassisning aytishicha, ayni paytda obyekt 9 gektar maydonni egallagan.
U shunchaki “raqamli post emas, balki intellektual bojxona posti”ga aylanishi rejalashtirilgan. Xususan, hududda ikki qatorli harakatlanish tizimi paydo bo‘ladi: ilgari faqat fuqarolar uchun amal qilgan “yashil” va “qizil” yo‘laklar endilikda yengil avtomobillar uchun ham ishlaydi.
Qayd etilishicha, shu maqsadda nazorat-o‘tkazish punktida Markaziy Osiyoda birinchi marta yengil avtomobillar uchun Z-portal skaner inspeksion-ko‘rik majmuasi o‘rnatildi. Shuningdek, tirbandliklarni bartaraf etish uchun rasmiylar post hududida 16 ta avtomobil yo‘lagi, shuningdek, avtobuslar uchun alohida yo‘laklar qurdi. Yangi tizim har yili 1500 dan ortiq avtomobil va kuniga 50 mingdan ortiq yo‘lovchini o‘tkazish imkonini berishi rejalashtirilgan.
Avvalroq O‘zbekiston va AQSH yadro kontrabandasiga qarshi kurashda hamkorlikni kengaytirishi xabar qilingandi. Mamlakatlarning chegara bojxona postlarida radiatsion portal monitorlari o‘rnatilishi boshlanadi.
Izohlar