O‘zbekistonda afg‘onistonlik sobiq deputat va tadbirkor qo‘lga olindi
Afg‘oniston parlamenti vitse-spikeri garovga 350 ming dollar qo‘yganiga qaramay hibsda saqlanmoqda.
Toshkentda Afg‘oniston parlamentining sobiq vitse-spikeri Abbos Ibrohimzoda qo‘lga olindi, deb yozadi Amu.
Balx viloyatidan sobiq deputat va eng yirik afg‘on tadbirkorlaridan biri 24-sentyabr kuni kechqurun uning biznes raqobatchilari tomonidan ko‘plab shikoyatlardan so‘ng hibsga olingan. O‘shandan beri u 350 ming dollardan ortiq garov puli kiritganiga qaramay hibsda saqlanmoqda.
Ma’lum qilinishicha, yirik tadbirkor asos solgan “Ibrahimzada Group” yigirmadan ortiq kompaniyani birlashtirgan, Balxdagi xususiy televideniye tarmog‘ini nazorat qilgan, ta’lim va xayriya ishlariga sarmoya kiritgan. Xususan, “Ibrahim Zada Group Charity Foundation” jamg‘armasi xotin-qizlarni savodli qilish bilan shug‘ullangan. O‘zbekiston rasmiylari hozircha rasmiy izoh bermadi.
Eslatib o‘tamiz, O‘zbekiston va Afg‘oniston mahalliy tadbirkorlarga yordam berish uchun qo‘shma vakolatxona ochgan. Tomonlar bu transport, logistika, savdo, sanoat va boshqa sohalardagi hamkorlikni kengaytirishga yordam berishiga umid qilmoqda.
Izohlar