O‘zbekiston Kaspiy dengizida parom qatnovini yo‘lga qo‘ymoqchi
Mamlakat Ozarbayjon va Turkmanistondan kemalar sotib olishni rejalashtirmoqda.
Transport vaziri Ilhom Mahkamov O‘zbekiston Turkmaniston va Ozarbayjondan kemalar sotib olishni rejalashtirayotganini ma’lum qildi, deb xabar bermoqda “O‘zbekiston 24” telekanali.
Transport vazirligi rahbari O‘zbekiston Kaspiy dengizida paromlar faoliyatini yo‘lga qo‘yishni rejalashtirayotganini ma’lum qildi. Kaspiy bo‘ylab yuk tashish ko‘paygani sababli 30−40 kunlik tirbandliklar yuzaga kelmoqda. O‘z kemalarining mavjudligi O‘zbekiston yuklarini Kaspiy orqali tashishni tezlashtiradi.
“Turkmanistonda ham Ozarbayjondagi kabi kemasozlik zavodlari bor. Bugun biz ushbu korxonalarda kemalarni sotib olish masalasini tahlil qilish va ko‘rib chiqishga kelishib oldik. Barcha texnik jihatlarni ishlab chiqish kerak va imzolangan hujjat bizga texnik va tijorat masalalarini erkin hal qilish imkonini beradi”, — dedi Ilhom Mahkamov.
Avvalroq O‘zbekiston va Turkmaniston to‘g‘ridan-to‘g‘ri aviaqatnovlarni tiklashi xabar qilingandi. Ikki tomonlama parvozlarni yo‘lga qo‘yish imkoniyati yaqin kelajakda paydo bo‘lishi mumkin.
Izohlar