O‘zbekiston afg‘onlar uchun biznes-viza olishni soddalashtirishi mumkin

Afg‘oniston O‘zbekistonga afg‘on tadbirkorlari uchun ishbilarmonlik vizalari va taklifnomalar olish tartibini soddalashtirishni taklif qildi, deb xabar bermoqda O‘zbekiston Savdo-sanoat palatasi matbuot xizmati.

Ma’lumotlarga ko‘ra, palata raisi Davron Vahobov Arian Azimiy boshchiligidagi Afg‘oniston delegatsiyasi bilan uchrashib, mamlakatlar o‘rtasidagi savdo-iqtisodiy hamkorlik masalalarini muhokama qilgan. Muloqot doirasida Afg‘oniston tomoni hamkorlikni kengaytirish, shuningdek, xususiy sektor o‘rtasidagi aloqalarni mustahkamlash va o‘zaro investitsiyalarni rag‘batlantirishga qaratilgan qator tashabbuslarni ilgari surdi.

Xususan, tomonlar Toshkent, Kobul, Termiz va Balxda har chorakda B2B uchrashuvlarini tashkil etish, shuningdek, Toshkentda ATSP vakolatxonasini ochish masalalarini muhokama qildilar, bu esa investitsiya aloqalarini mustahkamlashga yordam berishi kerak. Shuningdek, ikki mamlakat vakillari Termiz portida yuk tashish jarayonlarini jadallashtirish va bojxona tartib-taomillarini optimallashtirish masalalarini muhokama qildi.

Bundan tashqari, Afg‘oniston tomoni O‘zbekistonga afg‘on tadbirkorlari uchun ishbilarmonlik vizalarini berish va taklifnomalarni rasmiylashtirishni soddalashtirish, shuningdek, har yili Kobul va Toshkentda yoki Mozori-Sharif va Termizda ko‘rgazmalar o‘tkazishni taklif qildi. Tomonlar ushbu tashabbuslarning amalga oshirilishi ikki mamlakat o‘rtasidagi savdo hajmini oshirish, yangi investitsiya loyihalarini ishga tushirish va xususiy sektordagi hamkorlikni yanada faollashtirishga xizmat qilishini ta’kidladi.

Avvalroq toliblar Rossiya, AQSH va Xitoyga Afg‘oniston uchun kurashishni taklif qilgandi. Afg‘oniston mudofaa vaziri mamlakatlar qurilish va energetikaga sarmoya kiritish bo‘yicha raqobatlashishi kerakligini aytdi.