Navoiyda 8 yoshli qiz mashina bosib ketishi oqibatida halok boʻldi

Xatirchi tumanida yuqori tezlikdagi BYD Song Plus Champion mashinasi piyodalar oʻtish joyidan oʻtayotgan 2-sinf oʻquvchisini bosib ketdi.

1-iyul kuni soat 19:20 atrofida Navoiy viloyati Xatirchi tumanida 8 yoshli qiz yoʻl transport hodisasi oqibatida halok boʻldi.

Qayd etilishicha, holat tumandan oʻtgan 4R48 avtomobil yoʻlda sodir boʻlgan. BYD Song Plus Champion avtomashinasi tartibga solinmagan piyodalar oʻtish joyidan oʻtayotgan 2-sinf oʻquvchisini urib yuborgan.

Tarmoqlarda tarqalgan videoda yuqori tezlikda harakatlanayotgan 2 ta avtomobil piyodalar oʻtish joyiga yaqinlashib, fuqarolar oʻtayotganini koʻrgan boʻlsa-da, tezlikni pasaytirmagani va ularga yoʻl bermaganini koʻrish mumkin. Oldindagi mashina oʻtib ketgan, uning tez harakati taʼsirida qiz yiqilib tushgan va shu paytda orqadan 135−140 km/soat tezlikda kelayotgan BYD Song Plus Champion uni bosib ketgan.

Hodisa oqibatida qiz olgan tan jarohati sabab voqea joyida vafot etgan. Holat boʻyicha Jinoyat kodeksning 266-moddasi (Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qoʻzgʻatilgan. Hozirda tergov harakatlari olib borilmoqda.

NOVA24 YouTubeʼda. Obuna boʻling
Asosiy yangiliklar va qiziqarli videolar