Namanganda o‘qituvchilarni majburiy mehnatga jalb qilgan maktab direktori jarimaga tortildi

Pop tumanidagi maktabda o‘qituvchilarni o‘t-o‘lan yulishga majburlagan direktor 17 mln so‘m miqdorida jarimaga tortildi.

Namangan viloyati Pop tumanidagi maktablardan birining direktori o‘qituvchilarni majburiy mehnatga jalb qilgani uchun jarimaga tortildi, deya xabar bermoqda Bandlik vazirligi matbuot xizmati.

Qayd etilishicha, tumandagi 43-maktab direktori ta’til bo‘lishiga qaramay, pedagoglarni chaqirib, soat 16:00 gacha maktab hududidagi o‘t-o‘lan, beda va ajriqlarni yuldirgan. Biroq direktor bunday qonun-qoidalarning tashabbuskori emasligini aytgan, kimning buyrug‘i ekanligiga esa javob berishni istamagan.

O‘zim ham birga o‘sha yerlarni tozalayman. Endi oylik olgandan keyin ularga ham nimadir ish topib berish kerak-ku. Ichkarida ish yo‘q. Hamma joyda shunday. Saylov jarayonlari boshlandi. Nazorat uchun kelganlar obodonlashtirishni ko‘radi, degan direktor.

Bandlik vazirligi holat yuzasidan munosabat bildirarkan, Mehnat kodeksining 5-moddasi hamda Vazirlar Mahkamasining 349 sonli qaroriga zid ravishda muassasa xodimlari maktab hovlisida tozalov ishlariga jalb etilganini aniqladi.

Shu sababli, tashkilot rahbariga nisbatan Ma’muriy javobgarlik to‘g‘risidagi kodeksining 51-moddasi (Mehnatga ma’muriy tarzda majburlash) 1-qismiga asosan bazaviy hisoblash miqdorining 50 baravari (17 mln so‘m) miqdorida ma’muriy jarima qo‘llandi.

NOVA24 Telegramʼda. Obuna boʻling
Tezkor xabarlar va asosiy voqealar