Mutaxassislar “Mutaxassislar uyi” taqdiri atrofida davom etayotgan mojaroga izoh berdi

Madaniy meros agentligi Toshkent shahar boshqarmasi “”Mutaxassislar uyi”ni rasmiy ro‘yxatdan o‘tkazish va Moddiy madaniy meros obyektlari davlat reyestriga kiritish jarayoni yakuniy bosqichda ekanligini ma’lum qildi.

Aholi va hokimiyat o‘rtasidagi ziddiyat bir necha oydan beri davom etmoqda. 13 iyun kuni sud Beshyog‘och ko‘chasidagi 16 va 18-uylarda yashovchilarning da’vosini qanoatlantirib, Toshkent shahar hokimining 2024 yildagi qarorini bekor qildi. Biroq bu qaror ustidan qurilish kompaniyasi shikoyat qilgan — ish boshqa sudga o‘tkazilgan.

Shuningdek, Chilonzor tuman prokuraturasi tomonidan ham apellyatsiya shikoyati yuborilgan, biroq aholining so‘zlariga ko‘ra, ish ko‘rib chiqilayotgan vaqtda departament vakillari o‘z protestlarini qaytarib olgan.

Madaniy meros obyektlarini muhofaza qilish va ulardan foydalanish to‘g‘risidagi qonunga muvofiq, bu sohadagi qonun hujjatlarini buzgan shaxslar javobgarlikka tortiladi. Fuqarolar davlat muhofazasiga olingan tarixiy, ma’naviy, madaniy, ilmiy va tabiiy merosni asrab-avaylashlari shart.

“Mutaxassislar uyi” joylashgan Beshyog‘och mahallasida mahallaning eski binosi buzilib, yangisi qurilishi rejalashtirilgan. Loyiha “One Housing Group” xususiy kompaniyasi tomonidan amalga oshirilmoqda. Aholi tarixiy binolar yonida mehmonxonasi bo‘lgan ko‘p qavatli uy paydo bo‘lishidan xavotirda va qurilish yodgorliklarni xavf ostiga qo‘yishi mumkinligini da’vo qilmoqda.

Agentlik milliy madaniy merosni muhofaza qilish va asrab-avaylash bo‘yicha ishlarni to‘liq hajmda davom ettirishga va’da berdi.

Shu bilan birga, Beshyog‘och ko‘chasidagi ushbu uylarni Moddiy madaniy meros obyektlari davlat reyestriga rasmiy ro‘yxatdan o‘tkazish jarayoni yakuniy bosqichda, — deyiladi xabarda.

Eslatib o‘tamiz, Anhor sohilidagi “Beshyog‘och” mahallasida “Mutaxassislar uyi” taqdiri bo‘yicha aholi va hokimiyat o‘rtasida ziddiyat davom etmoqda. Loyihada mahallaning eski binosi buzilib, “One Housing Group” xususiy korxonasi tomonidan yangi obyekt qurilishi ko‘zda tutilgan. Aholi vakillarining so‘zlariga ko‘ra, taqdimotlarda ikki qavati mahalla markazi, qolgani mehmonxona uchun mo‘ljallangan ko‘p qavatli uyning eskizlari namoyish etilgan. Odamlar madaniy meros obyekti sifatida tan olingan tarixiy binolar yaqinida qurilish olib borilishi ularni xavf ostiga qo‘yishidan xavotirda.

Iyun oyida Toshkent tumanlararo ma’muriy sudi Toshkent shahar hokimi va Chilonzor tumani hokimining qarorlarini qabul qilishda shaharsozlik normalari buzilgani, madaniy meros obyektidan 100 metrdan kam masofada qurilish Vazirlar Mahkamasi qaroriga zid ekanini tan olgandi. Bundan tashqari, Kanallardan foydalanish boshqarmasi Anhor bo‘yida 10 metrlik qo‘riqlash zonasi mavjudligini va u yerda har qanday qurilish taqiqlanganini eslatib o‘tdi.

Aholining alohida noroziligiga jamoatchilik muhokamasi bayonnomasi sabab bo‘ldi, ularning so‘zlariga ko‘ra, bayonnoma soxtalashtirilgan. Sud qarori fuqarolar foydasiga chiqarilganiga qaramay, Chilonzor tuman prokuraturasi va qurilish kompaniyasi unga nisbatan shikoyat qilgan. Hozir ishni apellyatsiya instansiyasi ko‘rib chiqmoqda.

Mahalliy aholi “Mutaxassislar uyi”ning tarixiy qiymatini, yashil hududini saqlab qolishni, shuningdek, ushbu binolarning kelajagiga oid barcha qarorlarning shaffofligini ta’minlashni talab qilmoqda.