Kommunal xizmatlar va yo‘llar: Toshkentliklar ayni muammolardan shikoyat qilishni davom ettirmoqda
Poytaxt hokimligi an’anaviy ravishda shahar tumanlari reytingini e’lon qildi.
Poytaxt aholisi shahar muammolarini hal qilish uchun Xalq Nazorati platformasidan faol foydalanishda davom etmoqda. 2025-yil 17-oktyabr holatiga ko‘ra, portalga 54 441 ta murojaat kelib tushgan bo‘lib, ularning 86 foizdan ortig‘i ijobiy hal etilgan. Aksariyat murojaatlar uy-joy kommunal xo‘jaligi va yo‘llar holatiga oid bo‘lgan.
Toshkent shahar hokimligi ma’lumotlariga ko‘ra, barcha murojaatlarning 31,5 foizi uy-joy kommunal xo‘jaligi masalalari — suv, isitish va uylarni saqlashdagi uzilishlar bilan bog‘liq. Ikkinchi o‘rinda — yo‘llar va piyodalar yo‘laklarining asfalt qoplamasi holati (16,7%), keyingi o‘rinlarda — obodonlashtirish masalalari (5,5%) va ekologik muammolar (3,4%).
Murojaatlarning 54 349 tasi ishga yo‘naltirilgan, 46 961 tasi hal etilgan va faqat 92 tasi moderatorlar tomonidan rad etilgan.
17-oktyabr holatiga ko‘ra, 3 355 ta murojaatning muddati o‘tgan, 3 819 tasi ko‘rib chiqilmoqda. Eng ko‘p muddati o‘tgan masalalar Yunusobod (656), Shayxontohur (545), Sergeli (439) va Mirzo Ulug‘bek (408) tumanlarida qayd etilgan. Shahar bo‘yicha barcha muddati o‘tgan murojaatlarning 61 foizi ushbu 4 ta tumanga to‘g‘ri keladi.
Hokimlikka qarashli eng band tashkilotlar orasida quyidagilar ajratib ko‘rsatiladi:
- Obodonlashtirish bosh boshqarmasi — 1 393 ta murojaat, shundan 42 tasi muddati o‘tgan;
- Toshkent shahar Ekologiya boshqarmasi — 1 846 ta murojaat, shundan 139 tasi muddati o‘tgan;
- “Toshkent shahar elektr ta’minoti korxonasi” AJ — 6 303 ta murojaat, shundan 29 tasi muddati o‘tgan.
Murojaatlarni hal etish samaradorligi bo‘yicha Mirobod va Chilonzor tumanlari yetakchilik qilmoqda. Portalning yig‘ma reytingiga ko‘ra, Uchtepa tumani 8,67 ball bilan eng yuqori baholangan bo‘lsa, Sergeli tumani 2,12 ball bilan so‘nggi o‘rinni egalladi.
Bundan tashqari, OAV va ijtimoiy tarmoqlar (jumladan, Telegram va Facebook) monitoringi davomida mutaxassislar tomonidan 4 287 ta muammoli holat aniqlanib, murojaat sifatida rasmiylashtirildi va Xalq nazorati platformasiga kiritildi.
Izohlar