Hokimliklar ayollarni zo‘ravonlikdan himoya qilish majburiyatini oldi

O‘zbekistonda Vazirlar Mahkamasining “Xotin-qizlarni tazyiq va zo‘ravonlikdan himoya qilish tizimini yanada takomillashtirish chora-tadbirlari to‘g‘risida”gi qarori qabul qilindi, unga ko‘ra hokimliklarda yangi lavozim — hokim o‘rinbosari — oila va xotin-qizlar bo‘limi boshlig‘i lavozimi joriy etiladi, deb yozadi Norma.

Hujjat xotin-qizlarni tazyiq va zo‘ravonlikdan himoya qilish tizimini yanada takomillashtirish munosabati bilan qabul qilindi. Hokim o‘rinbosarlari o‘z vakolatlari doirasida davlat organlari tomonidan zo‘ravonlik sodir etgan shaxsga nisbatan amalga oshirilishi lozim bo‘lgan chora-tadbirlar bajarilmagan taqdirda, xotin-qizlarning huquqlari va qonuniy manfaatlarini ta’minlash sohasidagi qonun hujjatlari buzilishi holatlari hamda bunday huquqbuzarliklarni keltirib chiqaruvchi sabab va shart-sharoitlarni bartaraf etish yuzasidan ushbu tashkilotlarning mas’ul rahbarlariga majburiy taqdimnomalar kiritadi.

Avvalroq O‘zbekistonda tazyiq va zo‘ravonlik sodir etgan yoki sodir etishga moyil bo‘lgan shaxslarning tajovuzkor xulq-atvorini o‘zgartirish bo‘yicha tuzatish dasturi ishga tushirilishi haqida xabar berilgan edi. “Psixokorreksiya” tushunchasi — shaxs kamchiliklarini bartaraf etish va zo‘ravonlikka moyil shaxslarning xulq-atvorini jamiyat talablariga moslashtirishga qaratilgan psixologik va pedagogik ta’sir ko‘rsatish bo‘yicha chora-tadbirlar majmui.

Endi himoya orderlarini berishda vakolatli organlar va tashkilotlar, shu jumladan mahalliy hokimiyatlar, ta’lim va sog‘liqni saqlashni boshqarish organlari, psixologlar va jamoatchilik tuzilmalari tomonidan bir oygacha bo‘lgan muddatda amalga oshiriladigan chora-tadbirlar — tuzatish dasturidan o‘tganligi ko‘rsatilishi shart.