“G‘ishtko‘prik” bojxona postida 3 metrlik ilonni noqonuniy olib o‘tishga urinish bo‘ldi

Toshkent viloyatidagi bojxona postida 3 metrlik ilonni noqonuniy ravishda olib kirishga urinish aniqlandi.

Toshkent viloyatidagi “G‘ishtko‘prik” chegara bojxona postida 3 metrlik ilonni olib kirishga urinish fosh qilindi, deya xabar qildi Bojxona qo‘mitasi.

Qayd etilishicha, chegara bojxona postida qo‘shni davlatdan kirib kelgan piyodaga tegishli qo‘l sumkasi nazorat-rentgen uskunasi orqali ko‘zdan kechirilganida, uning ichida bojxona xodimlarining og‘zaki so‘rovida va yo‘lovchi bojxona deklaratsiyasida ma’lum qilinmagan 1 bosh ilon borligi aniqlangan.

3 metr uzunlikdagi ilon dastlabki ma’lumotlarga ko‘ra, yo‘lbarssimon albinos bo‘g‘ma iloni bo‘lib, asosan Janubiy va Janubiy-sharqiy Osiyoda yashaydi.

Ta’kidlanishicha, xalqaro Qizil kitobga kiritilgani sababli mazkur jonivorni O‘zbekiston Respublikasiga olib kirishda xalqaro CITIES ruxsatnomasi talab etiladi. Ammo, yuqoridagi holatda yo‘lovchi bu kabi hujjatlarni bojxona xodimlariga taqdim qila olmagan.

Holat yuzasidan bojxona organlari tomonidan surishtiruv harakatlari boshlangan. Ilon esa Toshkent hayvonot bog‘iga topshirilgan bo‘lib, mutaxassislar uning holatini barqaror deb baholashmoqda.

NOVA24 YouTubeʼda. Obuna boʻling
Asosiy yangiliklar va qiziqarli videolar