Фарғонада Lacettiʼнинг газбаллони портлади

Ҳодиса оқибатида ёнғин келиб чиққан ва машина ёниб кетган. Шунингдек, атрофдагилардан бир неча киши тан жароҳати олган.

Фарғона вилояти Риштон туманида тўхтаб турган Lacettiʼнинг газбаллони портлаб кетган.

Вилоят ФВБ ахборот хизматининг хабар беришича, ҳодиса 27 июнь куни соат 11:40 ларда содир бўлган.

Риштон тумани «Марказ» МФЙ ҳудудидаги деҳқон бозори олдида турган Lacettiʼ машинасининг метан газбаллони портлаб кетган.

Портлашдан сўнг ёнғин юз берган ва машина ёниб кетган. Портлаш вақтида машина ичида ҳеч ким бўлмаган. Бирламчи маълумотга кўра портлаш оқибатида машина атрофидаги шахслар турли даражада тан жароҳати олган.

Ёнғин Риштон тумани ФВБ ёнғинга қарши кураш бўлими ходимлари томонидан ўчирилган. Ҳозирда ҳолат юзасидан суриштирув ҳаракатлари олиб борилмоқда.

NOVA24 YouTubeʼda. Obuna boʻling
Asosiy yangiliklar va qiziqarli videolar