6 Yanvar 2025, 10:15 •Oʻzbekiston

Andijondagi savdo do‘konida yirik yong‘in yuz berdi

Shahrixon tumanida joylashgan savdo doʻkonining 300 kvadrat metr maydonda shift, tom qismi va maishiy jihozlar yonib zararlandi.

Andijon viloyati Favqulodda vaziyatlar boshqarmasi Shahrixon tumanida sodir boʻlgan yongʻin toʻgʻrisida maʻlumot berdi.

Qayd etilishicha, 5-yanvar kuni soat 22:57da Shahrixon tumani Amir Temur koʻchasida joylashgan maishiy savdo doʻkonida yongʻin sodir boʻlayotgani haqida FVBga xabar kelib tushgan. Unga koʻra, soat 23:00 da aytilgan manzilga yongʻin-qutqaruv ekipajlari yetib borgan va soat 23:45 da yongʻin toʻliq oʻchirilgan.

Yongʻin oqibatida savdo doʻkonining 300 kvadrat metr maydonda shift, tom qismi va maishiy jihozlar yonib zararlangan.

“Yongʻin natijasida fuqarolar tan jarohati olmagan. Yongʻin sodir boʻlish omillari va moddiy zarar miqdori aniqlanmoqda”, — deyiladi xabarda.