Zarafshonda portlovchi modda sotgan erkak qamaldi
Sudda fuqaro o‘z xatti-harakatlarining jinoiy xususiyatini anglamaganini aytdi.
Navoiy viloyatida 43 yoshli mahalliy fuqaro 775 gramm NDSI-2K sanoat portlovchi moddasini sotgani uchun sudlandi, deb xabar bermoqda Kun.uz.
Ish materiallariga ko‘ra, erkak ovchi va xususiy aravakash bo‘lib, 2017-yildan beri ovchilar va baliqchilar jamiyatiga a’zo bo‘lgan. Uning aytishicha, u Buxoro viloyati Shofirkon tumanida ov paytida ikkita porox tayoqchasini topib olgan va ulardan birini o‘zi o‘q yasash uchun ishlatgan.
Erkak tezkor tadbir davomida 1,5 mln so‘m evaziga modda bergan vaqtida qo‘lga olingan. Sudda erkak aybiga iqror bo‘ldi. U qilmishining jinoiy ekanini anglamaganini aytib, jazoni yengillashtirishni so‘radi.
Fuqaro Jinoyat kodeksining 248-moddasi 3-qismi (O‘qotar qurol, o‘q-dorilar, portlovchi moddalar yoki portlatish qurilmalarining qonunga xilof muomalasi) bilan aybdor deb topildi. Sud unga 5 yil 6 oy muddatga ozodlikdan mahrum qilish jazosi tayinladi.
Izohlar