Samarqandda taksi haydovchisi rossiyalik ayolni zo‘rlaganlikda gumon qilinmoqda

Samarqand viloyatida taksi haydovchisi Rossiya fuqarosini zo‘rlaganlikda gumon qilinmoqda, deb xabar berdi NeMolchi.

Jabrlanuvchining so‘zlariga ko‘ra, u 5-iyul kuni xususiy klinikada davolanish uchun Samarqandga kelgan. 12-iyul kuni plyajga ketayotganida taksi haydovchisi uni suvgacha kuzatib qo‘ygan, keyin esa ayolning aytishicha, uni zo‘rlagan. Voqeadan so‘ng ayol o‘zi IIBga yetib borgan.

Uning so‘zlariga ko‘ra, u yerda telefonini olib qo‘yishga urinishgan, keyin esa boshqa bo‘limga olib borishgan, u yerda u o‘zi tuzmagan arizani imzolagan. Ayol tibbiy ko‘rikdan o‘tish uchun olib ketilgan: shifokorlar tanasida ko‘karishlar va jarohatlar borligini qayd etishgan. Ginekolog ko‘rigi ham tan jarohati borligini tasdiqladi. Uning ta’kidlashicha, qonda alkogol aniqlanmagan.

Keyinchalik u haydovchi bilan yuzlashtirishda ishtirok etgan. Erkak aybini tan olmadi. 14-iyul kuni, murojaatchining so‘zlariga ko‘ra, uni xususiy klinikadan qo‘lkishan bilan olib ketishgan va izolyatorga joylashtirishgan. U yerda tunni o‘tkazdi, shundan so‘ng qo‘yib yuborildi. Keyinroq, 19-22-iyul kunlari shifokorlar yo‘llanmasi bilan ayol ruhiy kasalliklar shifoxonasida bo‘lgan.

Rasmiy ma’lumotnomaga ko‘ra, tekshiruv yakunlanmagan. 16-iyul kuni ayol Rossiyaning Toshkentdagi elchixonasiga murojaat qilgan. U yerda unga ariza yozishni va javobni kutishni tavsiya qilishdi. Jabrlanuvchi o‘ziga advokat ajratilishini va to‘liq tergov o‘tkazishda yordam berilishini so‘ramoqda. Uning so‘zlariga ko‘ra, tergov organlaridan hech kim u bilan aloqaga chiqmayapti.

“Umid qilamizki, mas’ul tuzilmalar bu ish bo‘yicha tez orada izoh beradi. Agar jinoyat, shuningdek, mansab vakolati doirasidan chetga chiqish sodir etilgan bo‘lsa, aybdorlar javobgarlikka tortilishi kerak”, — deyiladi xabarda.

Eslatib o‘tamiz, O‘zbekistonda qizini zo‘rlagani uchun erkak 12 yilga qamalgandi. Bolaga kompleks tibbiy, psixologik va ijtimoiy yordam ko‘rsatilmoqda.