Organ xodimlari Central Park’dagi hovuzdan baliq o‘g‘irlamoqchi bo‘lgan “baliqchi”ni topdi
Unga nisbatan ma’muriy bayonnoma rasmiylashtirildi.
IIBB Markaziy bog‘dagi hovuzdan baliq o‘g‘irlagan yigitni qo‘lga oldi va unga nisbatan ma’muriy bayonnoma rasmiylashtirdi.
Ma’lum bo‘lishicha, voqea 23 iyun kuni taxminan soat 22:00 larda Mirzo Ulug‘bek tumanidagi Central Park bog‘ida sodir bo‘lgan. 2003-yilda tug‘ilgan yigit hovuzdan baliqni yalang‘och qo‘llari bilan tortib oldi. O‘shanda 2000 yilda tug‘ilgan fuqaro uning xatti-harakatlariga e’tiroz bildirgan va baliqni suvga qo‘yib yuborishni so‘ragan.
Biroq, yigit jamoat joyida unga nisbatan uyatsiz so‘zlar aytib, jamiyatda o‘zini tutish qoidalarini qasddan buzgan. Mazkur holat yuzasidan fuqaroga nisbatan 183-modda (Mayda bezorilik) bilan ma’muriy bayonnoma rasmiylashtirilgan. Materiallar ko‘rib chiqish uchun Jinoyat ishlari bo‘yicha Mirzo Ulug‘bek tuman sudiga yuborilgan.
Eslatib o‘tamiz, 24 iyun kuni ijtimoiy tarmoqlarda erkakning qo‘llari bilan hovuzdan baliq o‘g‘irlagani va buni qilmaslikni so‘ragan ayolni haqorat qilgani aks etgan video tarqaldi.
Avvalroq xuddi shu bog‘da qashqadaryolik oila oqqushni tutib, kechki ovqatga yeganligi haqida xabar berilgandi. «Mehr va Oqibat» hayvonlarni himoya qilish jamiyati a’zolari ushbu oila a’zolari bilan bog‘ning o‘zida «mehribonlik suhbati» o‘tkazdi. Ko‘ngillilar ota va uning farzandlari bilan suhbatlashishdi, shundan so‘ng bolalar bilan birgalikda qushlarni boqishdi.
Izohlar