Andijon viloyatida sayyohlik agentligida norasmiy ishlagan va qariyb 20 ming fuqaroni noqonuniy Umra safariga jalb qilgan ayol qo‘lga olindi, deb xabar bermoqda IIV matbuot xizmati.
Ma’lumotlarga ko‘ra, ayol norasmiy ravishda “Jalolquduq Aviatrans”da turagent bo‘lib ishlagan. 2024-yildan 2025-yilgacha bo‘lgan davrda firma fuqarolardan 22,8 million dollar olish imkoniyatiga ega bo‘ldi. 41 yoshli ayol ish faoliyati davomida 19 547 nafar fuqaroni umra safariga noqonuniy safarlarga jalb qilgan.
Natijada davlat va jamiyat manfaatlariga yetkazilgan zararning umumiy summasi 1,8 mlrd so‘mni, soliqlar va boshqa majburiy to‘lovlarni to‘lashdan bo‘yin tovlash summasi esa 15,3 mlrd so‘mni tashkil etgan. Qayd etilishicha, Saudiya Arabistoniga yuborilgan 534 nafar fuqaro keyinchalik og‘ir ahvolda qolib, uy-joy bilan ta’minlanmagan.
Natijada mutaxassislar barcha jabrlanganlarni maxsus reyslar bilan vatanga qaytarishdi. Tartib posbonlari mazkur holat yuzasidan tegishli moddalar bilan jinoyat ishi qo‘zg‘atib, 13 nafar gumonlanuvchini qo‘lga olgan. Hozirda tergov harakatlari olib borilmoqda.
Avvalroq Saudiya Arabistonidan noqonuniy ziyoratdan jabr ko‘rgan yuzlab o‘zbekistonliklar qaytarilgani haqida xabar berilgan edi. Huquq-tartibot idoralari xodimlarining sa’y-harakatlari bilan 53 ta sayyohlik firmasi faoliyati to‘xtatildi.
