Navoiyda hokim yordamchisi pora bilan qo‘lga olindi
Davlat xizmatchisi allaqachon ijaraga berilgan yerni rasmiylashtirishda yordam berish orqali boyimoqchi bo‘lgan.
Navoiy viloyatida Karmana tumani hokimining tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha yordamchisi korrupsiyada gumonlanib qo‘lga olindi, deb xabar bermoqda DXX matbuot xizmati.
Gumonlanuvchi M-37 avtomobil yo‘li yoqasidagi 12 kvadrat metr yer maydonini boshqa bir fuqaro nomiga rasmiylashtirib berish evaziga 100 mln so‘m talab qilgan. Shu bilan birga, uchastka 2024-yilda ijaraga berilgan.
Huquq-tartibot idoralari xodimlari mahalla yig‘inlaridan birida hokim yordamchisini 40 mln so‘m olayotgan vaqtida qo‘lga olgan. Holat yuzasidan jinoyat ishi qo‘zg‘atilib, tergov harakatlari olib borilmoqda.
Avvalroq Sirdaryoda hokim o‘rinbosari pora bilan qo‘lga tushgani haqida xabar berilgandi. Amaldor fermerga xayoliy tekshiruvlar paytida yordam va homiylik ko‘rsatishni taklif qilgan.
Izohlar