Andijonda huquq-tartibot idoralari xodimlari bir kilogrammdan ortiq oltin buyumlar aylanmasiga chek qo‘ydi
Gumonlanuvchi fuqaro oltin solingan o‘ramni boshqa shaxsdan olgan bo‘lib, taqinchoqlarning hech qanday hujjati bo‘lmagan.
Andijonda katta miqdordagi zargarlik buyumlarini noqonuniy muomalaga kiritishga urinishning oldi olindi, deb xabar bermoqda Bojxona qo‘mitasi matbuot xizmati.
Huquq-tartibot idoralari xodimlari tomonidan dastlabki kuzatuvda bo‘lgan fuqaroga nisbatan boshqa shaxsdan jo‘natma kelgan vaqtda tezkor tadbir o‘tkazilgan. Posilkani ochib, tartib posbonlari unda umumiy og‘irligi 1 kg 138 g bo‘lgan 175 ta oltin buyumlari bo‘lgan uchta o‘ramni topdilar.
Gumonlanuvchining yonida bojxona hujjatlari, shuningdek, mahsulotlarning haqiqiyligi va sifatini tasdiqlovchi hujjatlar bo‘lmagan. Qayd etilishicha, olib qo‘yilgan buyumlarning dastlabki qiymati 2 mlrd so‘mni tashkil etadi. Hozirda mazkur holat yuzasidan huquq-tartibot idoralari xodimlari tomonidan surishtiruv ishlari olib borilmoqda.
Avvalroq Andijonda oltin buyumlarni noqonuniy olib kirishga uringan 3 nafar ayol qo‘lga olingani haqida xabar berilgandi. Huquqbuzar ayollar 200 grammdan ortiq oltinni nozik joylarga yashirishgan.
Izohlar