O‘zbekiston Afg‘onistonga insonparvarlik yordami topshirdi
Vayronkor zilzila munosabati bilan 265 tonna dori-darmon va oziq-ovqat jo‘natildi.
O‘zbekiston Afg‘onistonda sodir bo‘lgan vayronkor zilzila munosabati bilan qo‘shni davlatga umumiy og‘irligi qariyb 265 tonna bo‘lgan insonparvarlik yukini topshirdi, deb xabar bermoqda O‘zbekiston TIV matbuot xizmati.
Yukni topshirish marosimi Balx viloyatining Hayraton shahrida bo‘lib o‘tdi. Dori-darmon va oziq-ovqat mahsulotlarini o‘z ichiga olgan yuk Termez Cargo Centre maydonchasida shakllantirilib, 14 ta yuk mashinasida Hayratonga yetkazildi.
Balx viloyati rahbariyati nomidan kotibiyat mudiri F. Rabi nutq so‘zladi. U O‘zbekiston prezidenti Shavkat Mirziyoyevga minnatdorlik bildirib, O‘zbekiston rahbari va mamlakat xalqi barcha og‘ir davrlarda afg‘on xalqi bilan doimo yelkama-yelka turganini ta’kidladi. F. Rabi ushbu qo‘llab-quvvatlash afg‘on xalqi va uning rahbariyati hech qachon unutmaydigan haqiqiy birodarlikning namoyishi ekanini ta’kidladi, deyiladi xabarda.
Gubernator o‘rinbosari M. Idrisning ta’kidlashicha, insonparvarlik yuki aynan yordamga ehtiyoj yuqori bo‘lgan viloyatlarga yetkaziladi va muhtoj oilalarga topshiriladi. Zilzila ko‘proq sharqiy viloyatlarga – birinchi navbatda Kunar va Nangarhor, shuningdek, Lag‘mon, Nuriston va Panjsherning ayrim hududlariga ta’sir ko‘rsatdi.
Afg‘oniston vakillari O‘zbekistondan kelayotgan yordam faqat dori-darmon va mahsulotlardan iborat emasligini ta’kidladi. Bu hamjihatlik va insoniylikning bir ko‘rinishi, hatto eng og‘ir kunlarda ham yoningizda qo‘llab-quvvatlashga tayyor do‘st va qo‘shni borligining belgisidir. O‘zbek xalqi afg‘onlar xotirasida abadiy qoladigan rahm-shafqat va qalb saxovatini namoyish etgani haqidagi so‘zlar yangradi.
O‘zbekiston tomonidan O‘zbekiston prezidentining Afg‘oniston bo‘yicha maxsus vakili Ismatulla Irgashev va Surxondaryo viloyati hokimi Ulug‘bek Qosimov ishtirok etdi. Qayd etilishicha, qo‘shni davlatga ko‘rsatilayotgan yordam prezidentning yaxshi qo‘shnichilik munosabatlarini mustahkamlash, birdamlik ruhini rivojlantirish va afg‘on xalqini qo‘llab-quvvatlash borasidagi yo‘lini aks ettiradi.
Izohlar